Արցախում տարեկան մինչև 20 տոննա սև խավիար կարտադրվի. վարչապետ

Արցախի հանրապետությունում ծրագրվում է տարեկան մինչև 20 տոննա սև խավիար արտադրել: Այս մասին լրագրողների հետ հանդիպմանը հայտարարել է Արցախի վարչապետ Արայիկ Հարությունյանը:

Հիշեցնենք, 2015 թվականին հայտնի դարձավ, որ Մարտակերտի շրջանի Մատաղիս գյուղում գերմանացի մասնագետների օժանդակությամբ եւ Շվեյցարիայից հայազգի գործարար Վարդան Սիրմակեսի ներդրումների շնորհիվ սկսել է կենսագործվել հերթական հավակնոտ տնտեսական ծրագիրը: Ներդրումային ծրագրի արժեքը 30 մլն դոլար է:

ԱՀ վարչապետի խոսքով՝ խավիարն արդեն փորձաքննություն է անցել, իրացումը սկսել է խավիարի վաճառքով զբաղվող միջազգային ընկերությունը, որը պատրաստ է իրացմանը նպաստել և ներդրումներ կատարել:

2015 թվականին, նախագծի մեկնարկին, հայտարարվեց, որ Արցախի արտադրության սև խավիարը վաճառքում կհայտնվի արդեն հինգ տարի անց: Այսօր, սակայն, Արցախի վարչապետը նշում է վեց տարի ժամկետ. նրա խոսքով, աակնկալվում է, որ Արցախում և Հայաստանում արտադրանքը կվաճառվի մոտ 6 տարի հետո: