Արցախի ՊՆ-ն շարունակում է ջայլամի քաղաքականությունը. դեռ երեկ զինծառայող է վիրավորվել

Երեկ կեսօրին արցախա-ադրբեջանական սահմանին հակառակորդի կողմից հրազենային վիրավորում է ստացել ժամկետային զինծառայող Ալիկ Սմբատի Ավանեսյանը: Այս մասին տեղեկացրել է ՀՀ ՊՆ ռազմաբժշկական վարչության պետ, գնդապետ Կամավոր Խաչատրյանը:

Զինծառայողը ստացել է աջ ազդրի ստորին երրորդական միջանցիկ վիրավորում, այս պահին գտնվում է Ստեփանակերտի զինվորական հոսպիտալում: Բժիշկները նրա վիճակը գնահատում են ծանր:

Ուշագրավն այն է, որ օրերս Արցախի պաշտպանության նախարարությունը որոշում կայացրեց այլևս ամեն օր չհրապարակել առաջնագծում իրադրության վերաբերյալ տեղեկատվությունը: Բայց պարզվում է, որ ԱՀ ՊՆ-ն որոշել է անգամ նման տեղեկատվություն չտրամադրել և մեկ օր առաջ վիրավորված զինծառայողի մասին հասարակությունը, փաստորեն, տեղեկանում է ՀՀ պաշտպանության նախարարության ներկայացուցչից և ոչ թե պաշտոնական հաղորդագրությունից: