Երևանը ավագանի է ընտրում

Մայրաքաղաքում մեկնարկել են Երևանի ավագանու ընտրությունները, որին մասնակցում են քաղաքական երեք ուժ՝ Հանրապետական կուսակցությունը, «Ելք» դաշինքն ու «Երկիր ծիրանի» կուսակցությունը:

Սոցիոլոգիական հարցումների համաձայն՝ առաջատարն է Հանրապետական կուսակցությունը, որի ցուցակը գլխավորում է գործող քաղաքապետ Տարոն Մարգարյանը: Երկրորդ  տեղում, ըստ հարցումների, «Ելք» դաշինքն է, որի ցուցակը գլխավորում է ապրիլի 2-ին կայացած խորհրդարանական ընտրությունների արդյունքներով կրկին պատգամավոր ընտրված  Նիկոլ Փաշինյանը: Իսկ երրորդ տեղում է Զարուհի Փոստանջյանի «Երկիր» ծիրանի կուսակցությունը:

Ուշագրավ է, որ թեև վերջին երկու քաղաքական ուժերը ընդդիմադիր են Հանրապետականին, բայց հատկապես վերջին օրերին, այսպես ասած, պայքարում էին նաև միմյանց դեմ՝ Փաշինյանն ու Փոստանջյանը հասցրել են իրար հասցեին մեղադրական ու նախկին գործընկերությանը ոչ հարիր հայտարարություններով հանդես գալ:

Նշենք, որ Երևանում ընտրելու իրավունք ունի 841 973 քաղաքացի: