Թուրքական «Պեգասուս» ավիաընկերությունը հրաժարվեց Հայաստանի երկնքից

Օրերս VERELQ-ը տեղեկացրել էր, որ հունիսից թուրքական «Պեգասուս» բյուջետային ավիաընկերությունը կսկսի չվերթներ իրականացնել դեպի Հայաստան: Սակայն այսօր Քաղաքացիական ավիացիայի գլխավոր վարչության պետ Սերգեյ Ավետիսյանը տեղեկացրեց, որ թուրքական ավիաընկերության մուտքը հայաստանյան շուկա անորոշ ժամանակով հետաձգվում է:

Նրա խոսքով, քաղավիացիան նամակ է ստացել ավիաընկերությունից առ այն, որ առաջացել են որոշ տեխնիկական խնդիրներ: Ինչ վերաբերում է հարցին, թե որքանով է ռիսկային թուրքական ավիաընկերության մուտքը մեր շուկա, Ավետիսյանն արձագանքել է, որ ցանկացած ավիաընկերություն ինքն է որոշում կայացնում շուկա մուտք գործելու մասով, առավել ևս այն պարագայում, երբ ամենևին էլ գաղտնիք չէ, որ ՀՀ քաղաքացիներն ուղևորվում են Ստամբուլ:

Հիշեցնենք, տարածաշրջանի ամենաակտիվ լոուքոստերներից մեկը մտադիր էր հունիսի 1-ից, շաբաթը 3 անգամ Ստամբուլից «Զվարթնոց» միջազգային օդանավակայան թռիչքներ իրականացնել: