Փորձագետ. Անկարան ցանկանում է իրեն վերապահել Սիրիայի և Իրաքի հետպատերազմական վերաձևումը

Թուրքիայի ԳՇ–ն հաստատել է, որ նախօրեին օդային հարվածներ են հասցվել Իրաքի հյուսիսում գտնվող սիրիացի քրդերի դիրքերին։

Այս պահին Թուրքիան մտահոգված է, որ առանց իր մասնակցությամբ լուծվելու է հակակառավարական ջոկատների ջախջախման հարցն, ինչպես Սիրիայում, այնպես էլ Իրաքում։Հաղթանակի պտուղները հասնելու են այլ աշխարհաքաղաքական ուժերին, այլ ոչ թե Անկարային։ Այդ մասին pravda.ru–ին հայտնել է Հրապարակային իրավունքի հետազոտության մոսկովյան կենտրոնի նախագահ Աժդար Կուրտովը։

Նա նշել է, որ Անկարան շատ խանդով է վերաբերվում այդ հարցին և դա հասկանալի է, քանի որ Թուրքիան տարածաշրջանային գերտերություն է։ Ըստ նրա, Անկարան ցանկանում է իրեն վերապահել Սիրիայում ու Իրաքում հետպատերազմական վերաձևման իրավունքը։

«Թուրքիան չի ցանկանում տեսնել քրդական ինքնավարություն Սիրիայում ու Իրաքում, որոնք կունենան լայն լիազորություններ։ Բացի այդ, Անկարան ցանկանում է ազատագրված տարածքներում թուրքոմաններից ստեղծված ու Թուրքիայի կողմից վերահսկվող վարչակազմեր ստեղծել»,–նշել է նա։

Փորձագետը հավելել է, որ ավիացիոն հարվածները կոչված են ցուցադրելու Թուրքիայի տարածաշրջանային աճող նկրտումները։