«ՍԱՍ» -ի ժողովի հերոսին կարող է 3-5 տարի ժամկետով ազատազրկում սպառնալ

ՀՀ հատուկ քննչական ծառայությունում «ՍԱՍ» գրուպի աշխատակիցների հետ անցկացված նախընտրական ժողովի վերաբերյալ մամուլում հայտնված ձայնագրության հետ կապված քրեական գործ է հարուցվել ՀՀ քրեական օրենսգրքի 154²-րդ հոդվածի 2-րդ մասով: Այս մասին ասված է ՀՔԾ տարածած հաղորդագրության մեջ:

Նշվում է, որ «Չորրորդ իշխանություն» թերթի՝ 13.04.2017թ.-ի՝ «Կգնաք Փարիզ, փող կտանք, ընտրողներին էլ կտանք, չէ՝ կտուգանենք ու հինգ անգամ ավելի վատ կվերաբերվենք» վերտառությամբ հրապարակման հիման վրա նախապատրաստված նյութերը տեղեկություններ են պարունակում այն մասին, որ 2017 թվականի ապրիլի 2-ին կայացած ՀՀ ազգային ժողովի ընտրություններից առաջ` «ՍԱՍ-ԳՐՈՒՊ» ՍՊԸ-ի աշխատակիցների հետ տեղի ունեցած հանդիպման ժամանակ, դեռեւս չպարզված անձն իր ներկայացրած պատգամավորության թեկնածուի օգտին կողմ քվեարկելու համար հանդիպմանը ներկա մի շարք քաղաքացիների խոստացել է դրամ եւ այլ առավելություններ:

Ընտրողներին դրամ եւ այլ առավելություններ խոստանալու`վերը նշված դեպքի առթիվ ՀՀ հատուկ քննչական ծառայությունում հարուցվել է քրեական գործ ՀՀ քրեական օրենսգրքի 154²-րդ հոդվածի 2-րդ մասով (Ընտրողի կողմից թեկնածուներից, կուսակցություններից (կուսակցությունների դաշինքներից), հանրաքվեի քարոզչական նախաձեռնություններից կաշառք ստանալը կամ թեկնածուների, կուսակցությունների (կուսակցությունների դաշինքների), հանրաքվեի քարոզչական նախաձեռնությունների կողմից ընտրողներին կաշառք տալը կամ ընտրողի ազատ կամքի իրականացմանը խոչընդոտելը):

Կատարվում է նախաքննություն:

Նշենք, որ Քրեական օրենսգիրքը նախատեսում է պատիժ տուգանքի տեսքով՝ նվազագույն աշխատավարձի 2 000-ապատիկից 2 500-ապատիկի չափով, կամ ազատազրկում` 3-5 տարի ժամկետով:

Հիշեցնենք, ձայնագրությունը նախընտրական ժողովից է, որում մի տղամարդ ընկերության աշխատակիցներին հորդորում է ձայներ բերել Հանրապետականի ռեյտինգային թեկնածու Արտակ Սարգսյանի համար, հակառակ դեպքում նրանց հետ շատ վատ կվերաբերվեն կամ կազատեն աշխատանքից։