Հայաստանն ու Լեհաստանը կխորացնեն ռազմատեխնիկական գործակցությունը

Հայաստանի կառավարությունը փետրվարի 19-ի նիստում հավանություն է տվել Լեհաստանի հետ ռազմատեխնիկական համագործակցության մասին համաձայնագրի ստորագրմանը:

Փաստաթղթի նպատակն է ստեղծել իրավական հիմքեր պաշտպանական գերատեսչությունների միջև առավել սերտ և համակարգված փոխգործակցության համար: Երևանը կարևորում է Վարշավայի հետ բարձր մակարդակի հարաբերությունների ընդլայնումը, ինչը հեռանկարում թույլ կտա արձանագրել շոշափելի արդյունքներ անվտանգության ոլորտում և ներառել համագործակցության նոր ուղղություններ:

Համաձայնագիրը սահմանում է կողմերի միջև գործունեության հիմնական սկզբունքները, գաղտնի տեղեկատվության պաշտպանության կարգը և երրորդ երկրներին վաճառքի պայմանները: Բացի այդ, նախատեսվում է ստեղծել հատուկ հանձնաժողով, որը կապահովի երկկողմ ծրագրերի իրականացումը՝ հիմնվելով հավասարության և փոխշահավետության սկզբունքների վրա: