Հայաստանյան ընտրություններ. «Ազատության» լրագրողը ենթարկվել է հարձակման

Կոնդում այսօր հարձակման է ենթարկվել «Ազատության» թղթակից Սիսակ Գաբրիելյանը:

Ինչպես պատմել է թղթակիցը, ամեն ինչ սկսվել է այն բանից հետո, երբ նա նկատել է, որ ընտրողները, նախքան տեղամաս գնալը, մտնում են Հանրապետականի պատգամավորության թեկնածու Հակոբ Բեգլարյանի նախընտրական շտաբ: Դուրս գալուց նրանցից մի քանիսի ձեռքին թղթակիցը գումար է նկատել, որից հետո նույնպես մտել է շտաբ:

Տեղում գտնվող անձինք, նկատելով լրագրողին, պարզաբանել են, թե ոչ թե ընտրակաշառք են բաժանում, այլ աշխատավարձ: Այդ ժամանակ շտաբում գտնվող մի խումբ անձինք, այդ թվում՝ երիտասարդներ, հարձակվել են լրագրողի վրա, խլել հեռախոսը, սկսվել է քաշքշուկ և Սիսակ Գաբրիելյանը աչքի հատվածում թեթև վնասվածք է ստացել: Հարձակումը արձանագրել է տեսախցիկը:

Նշենք, որ Ոստիկանությունում միջադեպի առնչությամբ նյութեր են նախապատրաստվում և ձեռնարկվում են համապատասխան միջոցառումներ հանգամանքները պարզելու ուղղությամբ»: