«Ես արդարացվելու եմ, դուք կմնաք մեղավոր». Արքեպիսկոպոս Աջապահյանը՝ դատավորին

«Այսօր, տասը տարի հետո, թե անգամ իմ մահից հետո՝ ես արդարացվելու եմ, իսկ դուք կմնաք մեղավոր»,— ասաց Հայ Առաքելական Եկեղեցու Շիրակի թեմի առաջնորդ Միքայել արքեպիսկոպոս Աջապահյանը՝ ուղղվելով դատավոր Արմինե Մելիքսեթյանին օգոստոսի 18-ին, Երևանի ընդհանուր իրավասության առաջին ատյանի դատարանի Ավան նստավայրում կայացած նիստում։

Պաշտպան Երեմ Սարգսյանը ներկայացրեց դատավորին բացարկ հայտարարելու միջնորդություն՝ պնդելով, որ Մելիքսեթյանը ի վիճակի չէ ապահովել արդար դատաքննություն։ Սա Աջապահյանի գործի երկրորդ նիստն է։ Առաջին նիստում պաշտպանների՝ Երեմ Սարգսյանի և Արա Զոհրաբյանի միջնորդությունները կալանքը վերացնելու մասին մերժվել էին, իսկ կալանքի ժամկետը երկարացվել էր 10 օրով։

Մեղադրական եզրակացության համաձայն՝ Աջապահյանը, ունենալով բարձր հոգևոր աստիճան և լայն լսարան զանգվածային լրատվամիջոցներում, 2024 թ. փետրվարի 3-ին և 2025 թ. հունիսի 21-ին լրատվամիջոցներին տված հարցազրույցներում հնչեցրել է «իշխանության զավթմանն ուղղված հրապարակային կոչեր»՝ օգտվելով ԶԼՄ-ներից և տեղեկատվական-հաղորդակցական տեխնոլոգիաներից։

Արքեպիսկոպոսը և նրա պաշտպանական խումբը հայտարարում են, որ հետապնդումը քաղաքական դրդապատճառներ ունի և պահանջում են անկողմնակալ դատավարություն։