Հայաստանը ողջունում է Հնդկաստանի և Պակիստանի միջև հրադադարի համաձայնությունը. ԱԳՆ

Հայաստանի Հանրապետության արտաքին գործերի նախարարությունը պաշտոնապես հայտնել է իր աջակցությունը Հնդկաստանի և Պակիստանի միջև ձեռք բերված հրադադարի համաձայնությանը: Համապատասխան հայտարարությամբ հանդես է եկել արտաքին քաղաքական գերատեսչության պաշտոնական ներկայացուցիչ Անի Բադալյանը:

X սոցիալական ցանցում իր ուղերձում Բադալյանը ընդգծել է հակամարտող կողմերի միջև երկխոսության բացառիկ կարևորությունը: ՀՀ ԱԳՆ ներկայացուցիչը հույս է հայտնել ձեռք բերված պայմանավորվածությունների կայուն բնույթի վերաբերյալ՝ նշելով, որ հրադադարի ռեժիմի պահպանումը տարածաշրջանում խաղաղություն հաստատելու առանցքային գործոն է:

Հայտարարության մեջ հատուկ ուշադրություն է դարձվել կոնֆլիկտային իրավիճակների կարգավորման գործում միջազգային հանրության դերին: 

Հայկական կողմը հետևողականորեն հանդես է գալիս միջազգային հակամարտությունների խաղաղ կարգավորման օգտին և աջակցում է աշխարհի տարբեր տարածաշրջաններում լարվածությունը նվազեցնելուն ուղղված քայլերին:

Հնդկաստանի և Պակիստանի մայիսյան հակամարտությունը

Հրադադարի համաձայնությանը նախորդել է սուր էսկալացիա։ Մայիսի 7-ին Հնդկաստանը սկսել է «Սինդուր» գործողությունը՝ հարվածներ հասցնելով Պակիստանի տարածքում և Քաշմիրի պակիստանյան հատվածում գտնվող «ահաբեկչական ենթակառուցվածքին»։ Հնդկաստանի պաշտպանության նախարարությունը հայտարարել է 9 օբյեկտների ուղղված «կետային, զուսպ» հարվածների մասին՝ ընդգծելով, որ Պակիստանի ռազմական օբյեկտները չեն թիրախավորվել։

Պակիստանը հաղորդել է հարձակման հետևանքով 8 զոհերի և 35 վիրավորների մասին։ Իսլամաբադը հակահարված է հասցրել՝ հայտարարելով հինգ հնդկական կործանիչների խոցման և մի քանի ռազմական օբյեկտների ոչնչացման մասին։ Մայիսի 10-ին Պակիստանը հայտարարել է Հնդկաստանի դեմ լայնածավալ ռազմական գործողության մեկնարկի մասին՝ ավիաբազաների և զինամթերքի պահեստների վրա հարձակումներով։

Քաշմիրի հովիտը կրկին դարձել է հակամարտության էպիկենտրոն։ 26 զբոսաշրջիկների կյանքեր խլած հարձակումներից հետո տարածաշրջանը համակել է խուճապը։ Հնդկաստանը մեղադրում է Պակիստանին «անդրսահմանային ահաբեկչության» աջակցման մեջ, իսկ ոստիկանությունը հետախուզում է Պակիստանում հիմնված «Լաշքար-ի-Թայբա» ահաբեկչական խմբավորման երեք ենթադրյալ անդամների։