Գեղամ Մանուկյան. Մարտական հերթապահության համար վճարում եք 1700 դրամ, իսկ պարեկին՝ 11 000

«Հայաստան» խմբակցության պատգամավոր Գեղամ Մանուկյանը Ազգային ժողովում քննադատել է զինված ուժերում սերժանտական ինստիտուտի թերի ներդրումն ու զինծառայողների աշխատավարձերի նկատմամբ անարդար մոտեցումը։ Նրա խոսքով՝ կառավարության ներկայացրած նոր օրենքի նախագծի քննարկումը կարևոր պահ է զինված ուժերում համակարգային նորամուծություն մտցնելու համար։

«Սերժանտական ինստիտուտը ներդրվել է դեռ 2008 թվականին, բայց մինչ օրս այն ամբողջությամբ չի գործարկվել։ Սերժանտը զինված ուժերում պետք է դիտարկվի որպես ծնող, ով ամենօրյա հոգատարություն է ցուցաբերում զինվորի նկատմամբ։ Սակայն այսօր սերժանտի աշխատավարձը ընդամենը մոտ 222 000 դրամ է, իսկ պարեկը, ով նույնիսկ ատեստացիա չի անցնում, ստանում է 371 000 դրամ», — ասաց պատգամավորը։

Մանուկյանը շեշտեց, որ մարտական հենակետում հերթապահություն իրականացնող պայմանագրային զինծառայողը մեկ օրվա համար ստանում է ընդամենը 1700 դրամ, մինչդեռ պարեկը՝ 11 000, իսկ ԱԺ պատգամավորները՝ շուրջ 22 000 դրամ։

«Սա է իրականությունը։ Սա՛ է ձեր արդարությունը։ Մարտական հենակետում անձրևի տակ կանգնած զինվորը ստանում է ամենացածր գումարը», — ընդգծեց նա։

Պատգամավորը նաև քննադատեց պաշտպանության նախարարության առաջարկած ատեստացիոն համակարգը՝ նշելով, որ այն առավելապես վերաբերում է շտաբային բարձրաստիճան պաշտոնյաներին։ «Մի դիպուկահար, ով մասնակցել է 2022 թվականի մարտական գործողություններին և փրկել է տասնյակ կյանքեր, կտրվել է ատեստացիայից՝ շարքային պատրաստվածության թեստից։ Սա պարզապես անհասկանալի է», — ասաց Մանուկյանը։

Նա կոչ արեց կառավարությանը վերանայել մոտեցումները՝ հանուն զինված ուժերում արդարության և մասնագիտական արժևորման։