Հարկային արտոնություններ են տրվել դեղագործական արտադրության և ՏՏ ոլորտի համար

Հայաստանի կառավարությունն ընդունել է մի շարք որոշումներ, որոնք ուղղված են դեղագործական արդյունաբերության և բարձր տեխնոլոգիաների ոլորտի զարգացման խթանմանը: Մարտի 27-ի նիստում ընդունված որոշման համաձայն, «Մեդիկալ հորիզոն» ընկերությունը կազատվի մաքսատուրքերից գերակա ոլորտում իրականացվող ներդրումային ծրագրի շրջանակներում:

Ընկերությունը նախատեսում է ներմուծվող հումքն օգտագործել դեղորայքի արտադրության համար՝ 187 միլիոն դրամ ներդնելով հումքի ձեռքբերման և շինարարական աշխատանքների իրականացման մեջ:

Ներկայումս ձեռնարկությունն ապահովում է 83 աշխատատեղ՝ 302 հազար դրամ միջին ամսական աշխատավարձով: Մինչև 2028 թվականը նախատեսվում է աշխատատեղերի թվի ավելացում մինչև 104՝ 560 հազար դրամ միջին ամսական աշխատավարձով:

Արտոնություն ստանալու համար ներկայացված ապրանքների արժեքը կազմում է 187 միլիոն դրամ: Տրամադրված մաքսատուրքից ազատման արտոնությունը գնահատվում է 14 միլիոն դրամ:

Բացի այդ, կառավարությունը հաստատել է Բարձր տեխնոլոգիաների ոլորտի մասնագիտական աշխատանքների ցանկը: Այս որոշման շնորհիվ տնտեսավարող սուբյեկտները, համապատասխանելով «Բարձր տեխնոլոգիաների ոլորտի պետական աջակցության մասին» օրենքի և ՀՀ հարկային օրենսգրքի պահանջներին, կկարողանան օգտվել ոլորտի պետական աջակցությունից և հարկային արտոնություններից:

Նույն նիստում ընդունվել է նաև փաստաթուղթ, որը սահմանում է խաղային գործունեության կազմակերպչի կանոնադրական կապիտալում նշանակալից մասնակցություն ձեռք բերելու և պատասխանատու անձ համարվելու ստուգման կարգը:

Որոշումը սահմանում է ստուգման միջնորդության, անհրաժեշտ տեղեկությունների և փաստաթղթերի ներկայացման ընթացակարգը, ինչպես նաև այդ տեղեկությունների և փաստաթղթերի ձևերը: