Հայաստանում կխստացվի դեղերի գովազդի վերահսկողությունը

Մարտի 27-ին կայացած նիստում Հայաստանի կառավարությունը հաստատել է դեղերի, բժշկական արտադրատեսակների և բուժական մեթոդների գովազդի թույլտվության տրամադրման կարգը, ինչպես նաև սահմանել է անհրաժեշտ փաստաթղթերի ցանկը, այդպիսի գովազդին ներկայացվող պահանջները և գովազդային նյութերի փորձաքննության ընթացակարգը:

Հաստատված ընթացակարգի համաձայն, դեղամիջոցների վերաբերյալ գովազդային նյութերն այժմ պետք է անցնեն նախնական փորձաքննություն, որի արդյունքում կտրամադրվի համապատասխան եզրակացություն գովազդի թույլտվություն ստանալու համար: Փորձաքննության ընթացքում կգնահատվի գովազդային նյութերի համապատասխանությունը «Դեղերի մասին» ՀՀ օրենքով սահմանված պահանջներին:

Նոր կանոնների համաձայն՝ դեղերի, բժշկական արտադրատեսակների և բուժական մեթոդների գովազդի թույլտվության տրամադրման, իսկ դեղերի դեպքում՝ նաև թույլտվության տրամադրման նպատակով իրականացվող փորձաքննության համար կգանձվի պետական տուրք: Կառավարության որոշման մեջ նախատեսված են համապատասխան դրույթներ:

Հաշվի առնելով ընթացիկ թվայնացման գործընթացները՝ առաջարկվում է նաև անցում կատարել դիմումատուների հետ ամբողջովին էլեկտրոնային հաղորդակցմանը: