Փաշինյանը հանձնարարել է ստուգել մայթերի վրա տեղակայված՝ հետիոտներին խանգարող օբյեկտները

Հայաստանի վարչապետը մտահոգված է քաղաքացիների տեղաշարժման անհարմարություններով՝ մայթերի վրա տեղակայված առևտրային օբյեկտների պատճառով:

Հայաստանի վարչապետ Նիկոլ Փաշինյանը տեսչական մարմիններին հանձնարարել է ստուգել մայթերի եզրերին տեղակայված օբյեկտները, որոնք անհարմարություն են առաջացնում հետիոտների համար։ Այս հայտարարությունը հնչել է նոյեմբերի 28-ի կառավարության նիստում։

Հանձնարարականը հետևել է վարչապետի անձնական փորձից՝ Հայաստանի բնակավայրերից մեկում զբոսանքի ժամանակ։ «Մայթով քայլելու ընթացքում ես ստիպված էի քայլել ժավելների, քսայուղերի, տարաների արանքներով, որովհետև դրանք ուղղակի մայթերին շարած վաճառում են»,- կիսվել է Փաշինյանը։

Վարչապետը նշել է, որ թեև կառավարությունն ուրախ է Հայաստանում բիզնեսի ծաղկման համար, կան խնդիրներ, որոնք ուշադրության կարիք ունեն։ Մասնավորապես, նա մատնանշել է ավտոմեքենաների ինքնասպասարկման լվացման կետերը, որոնք հաճախ տեղակայված են մայթի եզրին, որտեղ ջրի շիթերը հասնում են հետիոտնային գոտի։

«Սա լրջագույն խնդիր է։ Երևանում ևս նման իրավիճակներ կան, երբ օբյեկտները տեղակայված են մայթի եզրին, իսկ ջրի շիթերը հասնում են քաղաքացիներին։ Հարցն այն է՝ տրվե՞լ է շինարարության թույլտվություն, գործունեության թույլտվություն, թե՞ ոչ»,- ընդգծել է Փաշինյանը։

Նա հատկապես նշել է, որ մայթերը նախատեսված են հետիոտների համար՝ անկախ դրանց օգտագործման ինտենսիվությունից։ «Չենք կարող ասել՝ քաղաքացին այստեղով չի քայլում, ուրեմն ռեստորան սարքենք»,- հայտարարել է վարչապետը։

Տեսչական մարմիններին հանձնարարվել է ստուգել մայթերի վրա օբյեկտների տեխնիկական պարամետրերը՝ քաղաքացիների հարմարության և անհարմարության տեսանկյունից։