Ադրբեջանի ԱԳ նախարարը հայտարարել է Հայաստանի հետ բանակցություններում առաջընթացի մասին

Ադրբեջանի արտգործնախարար Ջեյհուն Բայրամովը Մեծ Բրիտանիայի պետնախարար Սթիվեն Դաութիի հետ հեռախոսազրույցում հայտարարել է Հայաստանի հետ խաղաղության պայմանագրի շուրջ բանակցային գործընթացում էական առաջընթացի մասին:

Ադրբեջանի ԱԳՆ մամուլի ծառայության հաղորդման համաձայն, զրույցի ընթացքում Բայրամովը մանրամասն ներկայացրել է Հարավային Կովկասում կայուն խաղաղության հաստատման վերաբերյալ Բաքվի տեսլականը և պատմել է այդ ուղղությամբ ձեռնարկված գործնական քայլերի մասին:

Նախարարը ընդգծել է, որ ադրբեջանական կողմի նախաձեռնած խաղաղության պայմանագրի շուրջ բանակցային գործընթացում էական առաջընթաց է գրանցվել, և ներկայումս աշխատանքներ են տարվում նախագծի ընդհանուր համաձայնեցման ուղղությամբ:

Բայրամովի խոսքով, գործընթացի հիմնական խոչընդոտը իբր Հայաստանի Սահմանադրության մեջ առկա տարածքային պահանջներն են Ադրբեջանի նկատմամբ: Հայաստանը կտրականապես հերքում է Բաքվի այս մեղադրանքները:

Ավելի վաղ Հայաստանի արտաքին գործերի նախարար Արարատ Միրզոյանը հայտարարել է Ադրբեջանի հետ խաղաղության պայմանագրի շուտափույթ ստորագրման հնարավորության մասին: Նրա խոսքով, մնացել է համաձայնեցնել ընդամենը «մեկ-երկու ձևակերպում», որից հետո փաստաթուղթը պատրաստ կլինի ստորագրման:

Հոկտեմբերի 31-ին խորհրդարանում 2025 թվականի բյուջեի քննարկման ժամանակ ելույթ ունենալով՝ ԱԳ նախարարը «զգուշավոր լավատեսություն» է հայտնել մոտ ապագայում բանակցությունների ավարտի հեռանկարների վերաբերյալ:

Ներկայումս պայմանագրի 16 հոդվածներից ամբողջությամբ համաձայնեցված են 13-ը, ևս երեքը՝ մասնակիորեն: Ավելի վաղ Բաքուն բազմիցս մերժել է արդեն համաձայնեցված հոդվածներով պայմանագիր ստորագրելու Երևանի առաջարկը՝ պնդելով խաղաղության պայմանագրի բոլոր կետերի ամբողջական համաձայնեցման վրա: