Կառավարությունը 2,6 միլիարդ դրամ կհատկացնի նոր դպրոցների կառուցման համար

Հայաստանի կառավարությունը որոշում է ընդունել ավելի քան 2,6 միլիարդ դրամ հատկացնել երկրի տարբեր մարզերում 11 դպրոցների և կրթահամալիրների կառուցման համար։ Որոշումն ընդունվել է հոկտեմբերի 31-ի նիստում՝ «300 դպրոց, 500 մանկապարտեզ» պետական ծրագրի շրջանակներում։

Կրթության, գիտության, մշակույթի և սպորտի նախարար Ժաննա Անդրեասյանի խոսքով, 300 նախատեսված դպրոցներից 223-ում աշխատանքներն արդեն ընթանում են, իսկ 35-ում շինարարությունն ամբողջությամբ ավարտված է։ Նոր կրթահամալիրներ կստեղծվեն Վայոց ձորի մարզի Գետափ և Արևաբույր համայնքներում և Արմավիրի մարզի Վարդանաշենում։

Դպրոցներ կկառուցվեն Նոյեմբերյանում, Աղավնավանքում, Լեռնանիստում, Տաշիրում, Գեղակերտում, Վաղարշապատում և Վեդիում։

Հիշեցնենք, որ օրեր առաջ վարչապետ Նիկոլ Փաշինյանի գլխավորությամբ տեղի էր ունեցել խորհրդակցություն, որի ընթացքում քննարկվել է Կառավարության «300 դպրոց, 500 մանկապարտեզ» ծրագրի կատարման ընթացքը:

Փոխվարչապետ Տիգրան Խաչատրյանը զեկուցել է, որ ընդհանուր առմամբ ավարտվել կամ իրականացման տարբեր փուլերում են գտնվում 223 դպրոցի և կրթահամալիրի կառուցման, հիմնանորոգման և վերանորոգման աշխատանքները: Ըստ այդմ՝ կառուցման աշխատանքները վերաբերում է 183 դպրոցի, հիմնանորոգման աշխատանքները՝ 17 և նորոգման աշխատանքները՝ 23 դպրոցի: 223 դպրոցներն, ըստ աշակերտական հզորության, 72 հազար է, իսկ 300 դպրոցի դեպքում կլինի 100 հազարից ավելի: