Առաջին ճաքերը. Նախկին ՄԻՊ-ը դեմ է Սեյրան Օհանյանի դաշինքը գլխավորելուն

Համաձայն չեմ «Համախմբում» կուսակցության կողմից ընտրված դաշինքի կազմին: Առավել ևս՝ ինձ համար անընդունելի է, որ դաշինքը գլխավորի պաշտպանության նախկին նախարար Սեյրան Օհանյանը: Նման հայտարարությամբ հանդես է եկել Մարդու իրավունքների նախկին պաշտպան Կարեն Անդրեասյանը:

Նրա խոսքով՝ իշխանափոխության համար լայն համախմբում է անհրաժեշտ, որի մեջ կարելի է ներառել նաև նախկինում սխալված կամ մեղքեր գործած միայն այն մարդկանց, ովքեր անկեղծորեն զղջալով՝ անցել են քաղաքական կամ իրավական քավարանով:

«Չի կարելի, սակայն, նույնիսկ հանուն բոլորիս երազած իշխանափոխության խառնել կոռումպացված ու չկոռումպացված մարդկանց, աշխարհաքաղաքական հակադիր կողմնորոշումները, արժեքային ծայրահեղ տարբեր բևեռները, քանի որ այդ դեպքում մեծ է պարտության հավանականությունը, ու նաև կա վտանգ, որ հաղթանակի պարագայում դևին սպանողն ինքը դև կդառնա: Անվերջանալի դատաիրավական կոռուպցիայի, չդադարող թալանի, սոսկալի անարդարությունների, համատարած աղքատության ու արտագաղթի պայմաններում միակ հույսը մնում է հեղափոխական նոր ձևաչափը»,- ասված է Անդրեասյանի հայտարարության մեջ:

Հիշեցնենք, Կարեն Անդրեասյանը ՄԻՊ պաշտոնից հրաժարական է ներկայացրել անցած հունվարին, որից հետո միացավ Վարդան Օսկանյանի ստեղծած կուսակցությանը: