ՀՔԾ-ն կարճել է օֆշորային սկանդալով քրեական գործով վարույթը
ՀՀ Հատուկ Քննչական Ծառայությունը կարճել է Միհրան Պողոսյանի անվան հետ կապված օֆշորային սկանդալով քրեական գործով վարույթը: Այս մասին տեղեկացնում են Միհրան Պողոսյանի գրասենյակի տարածած հաղորդագրությունից:
«Արդարադատության գեներալ-մայոր Միհրան Պողոսյանին վերագրվող օֆշորային հայտնի հրապարակումները և ՀՀ Հատուկ քննչական ծառայությունում այդ նյութերով հարուցված քրեական գործը անցած ավելի քան 8 ամիսների ընթացքում եղել է պատկան մարմինների, հասարակության լայն շրջանակների անաչառ ուշադրության կենտրոնում:
Քրեական վարույթի իրականացման ընթացքում աջակցություն ենք ցուցաբերել Հատուկ քննչական ծառայությանը, իսկ իրականությանը չհամապատասխանող հրապարակումների վերաբերյալ պարբերաբար տեղեկատվություն ենք տվել հասարակությանը և ԶԼՄ-ների ներկայացուցիչներին: Ի թիվս մամուլի հրապարակումներում առկա հարցապնդումները հերքող մի շարք այլ փաստաթղթերի՝ ներկայացվել է, օրինակ, օֆշորային ընկերությունների և Միհրան Պողոսյանին վերագրվող հաշիվների առկայության վերաբերյալ շվեյցարական «LGT» բանկի հայտնի հերքումը, որով փաստվում է, որ բանկային հաշիվներ չեն բացվել, հետևաբար՝ չկա ֆինանսական շարժ, ուստի և՝ խոսք չի կարող լինել ձեռնարկատիրական գործունեության մասին։
Հայտնում ենք, որ ՀՀ Հատուկ Քննչական Ծառայությունը քրեական գործով վարույթը կարճել է՝ ղեկավարվելով ՀՀ քրեական դատավարության օրենսգրքի 18-րդ հոդվածով, 35-րդ հոդվածի 1-ին մասի 2-րդ կետով, 55-րդ հոդվածով, 124-127-րդ և 261-263-րդ հոդվածներով՝ արարքում հանցակազմի բացակայության հիմքով»,- ասված է հաղորդագրության մեջ:
Հիշեցնենք, 2016 թվականի ապրիլի սկզբին մամուլը անդրադարձավ Հետաքննող լրագրողների միջազգային կոնսորցիումը (ICIJ) գաղտնազերծեց Բրիտանական Վիրջինյան կղզիներում, Պանամայում, Սեյշելներում, Բահամյան կղզիներում, Նևադայում, Հոնկ Կոնգում, Միացյալ Թագավորությունում, Բելիզում, Կոստա Ռիկայում, Մալթայում, Նոր Զելանդիայում, Կիպրոսում, Սինգապուրում և մի քանի այլ վայրերում գրանցված միլիոնավոր օֆշորային ընկերությունների փաստաթղթեր: Տվյալների այդ բազայում առկա էր նաև ԱՆ ԴԱՀԿ ծառայության պետ Միհրան Պողոսյանը և նրա քեռիների՝ Գրիգորի եւ Միխաիլ Հարությունյանների ընտանիքների անդամների անունները: Միհրան Պողոսյանը հերքեց իր կապը օֆշորային ընկերությունների հետ և հրաժարական տվեց ԴԱՀԿ ծառայության պետի պաշտոնից:
Շրջանառվող լուրերի համաձայն՝ նա պայմանավորվածություն ունի իշխանությունների հետ և առաջիկա խորհրդարանական ընտրություններին մասնակցություն է ունենալու՝ ռեյտինգայինով առաջադրվելով ՀՀԿ-ից: Քրեական գործի կարճումը, այսպես ասած, «կանաչ լույս է» Միհրան Պողոսյանի հետագա քաղաքական կարիերայի համար:
