Հայկական կողմը 31 գյուղերն է շարունակում պահանջել. նախարար

Դելիմիտացիան նրա համար է, որ հստակ ընդգծվի այն սահմանագիծը, որից այս կողմ Հայաստան է, այն կողմ՝ Ադրբեջան: Այս մասին լրագրողների հետ զրույցում ասաց ՀՀ տարածքային կառավարման և ենթակառուցվածքների նախարար Գնել Սանոսյանը՝ խուսափելով հստակ պատասխան տալ հարցին, թե ո՞րն է Տավուշի մարզում այդ սահմանագիծը:

Հիշեցնենք, նախօրեին ասուլիսի ժամանակ ՀՀ վարչապետ Նիկոլ Փաշինյանը հայտարարեց, որ դելիմիտացիայի գործընթացը մեկնարկելու է Տավուշի մարզից:

Անդրադառնալով Ադրբեջանի պահանջներին, նախարարը նշեց. "Տավուշի 4 գյուղերը, որոնք Ադրբեջանը պահանջում է, Հայաստանի վարչական տարածքում չեն գտնվում, Հայաստանի 29.800 հազարի մասին չէ խոսքը: Հայկական կողմն էլ 31 գյուղերն է շարունակում պահանջել"։

Ճշտող հարցին, թե երբ Փաշինյանը խոսում էր ենթակառուցվածքների մասին, դա միայն դեպի Վրաստան ճանապարհի՞ մասին էր, թե նաև գազատարի, Սանոսյանն արձագանքեց, թե ընդհանուր աշխատանք պետք է արվի, որից կպարզվի միայն ճանապարհը, միայն գազատարը, թե կարող է այլ ինչ-որ ենթակառուցվածքի էլ վերաբերվի։