Սետրակովին ձերբակալելու մասին միջնորդություն ՀՀ գլխավոր դատախազությունում չի ստացվել

Դմիտրի Սետրակովին ձերբակալելու, կալանավորելու և ՌԴ իրավասու մարմիններին հանձնելու (էքստրադիցիայի) մասին միջնորդություն ՀՀ գլխավոր դատախազությունում չի՛ ստացվել, չի՛ քննարկվել, չի՛ բավարարվել: Այս մասին հայտնել է ՀՀ գլխավոր դատախազի՝ ԶԼՄ-ների հետ կապերի գծով խորհրդական Լուսինե Մարտիրոսյանը։

Նա նշել է, որ Դմիտրի Սետրակովի՝ ՌԴ իրավասու մարմինների կողմից հետախուզման, ինչպես նաև վերջինիս ՀՀ տարածքում հայտնաբերման վերաբերյալ տեղեկություն ՀՀ գլխավոր դատախազությունում առկա չէ:

Սետրակովի վերաբերյալ իրավապաշտպան Արթուր Սաքունցի դիմումն ուղարկվել է օպերատիվ հետախուզական գործունեություն իրականացնող մարմին՝ դրանում ներկայացված տեղեկությունները ստուգելու նպատակով, ինչից հետո կքննարկվի վարույթ նախաձեռնելու հարցը:

Նշենք, որ ավելի վաղ Արթուր Սաքունցը հայտարարել է, թե դեկտեմբերի 8-ին ստացել է ահազանգ ռուսական իրավապաշտպան կազմակերպության կողմից, որ ռազմական ոստիկանության կողմից ձերբակալվել է պայմանագրային զինծառայող Դմիտրիյ Սետրակովը, որին հետո տեղափոխել են 102-րդ ռուսական բազայի տարածք։

«Ձերբակալելու ու տեղափոխելու մասին հայտնել է Սետրակովի կինը, որին զանգահարել են հայկական հեռախոսահամարով, ներկայացել որպես Հայաստանի Հանրապետության ՌՈ աշխատակիցներ։ Տեղեկատվությունը ստանալուց հետո մի շարք հրատապ գործողություններ իրականցրեցինք։ Առաջինը գրություն ուղարկեցինք Գլխավոր դատախազություն, որ ՀՀ տարածքում ռուսական իրավապահների կողմից ձերբակալվել է անձը՝ ՌԴ քաղաքացին, և տեղափոխվել բազա։ Դիմել ենք գլխավոր դատախազությանը՝ միջոցներ ձեռնարկելու առաջին հերթին փաստացի առևանգումը կատարած անձանց դեմ քրեական գործ հարուցելու, ապա Սետրակովին ազատելու ապօրինի անազատությունից, կանխելու նրա հնարավոր տեղափոխումը ՀՀ տարածքից դուրս՝ խոշտանգումներից զերծ մնալու»,-ասել է նա։