Պրիգոժինի հայտարարություններից հետո ՌԴ ԱԴԾ-ն ապստամբություն հրահրելու քրգործ է հարուցել

Ռուսական «Վագներ» մասնավոր ռազմական ընկերության հիմնադիր Եվգենի Պրիգոժինի հայտարարությունները հիմք են հանդիսացել զինված ապստամբություն հրահրելու հատկանիշով քրեական գործ հարուցելու համար։ Այս մասին հայտնել են ՌԴ Ազգային հակաահաբեկչական կոմիտեում։ Կառույցը Պրիգոժինին կոչ են արել դադարեցնել անօրինական գործողությունները։

«Եվգենի Պրիգոժինի անունից տարածված մեղադրանքները ոչ մի հիմք չունեն: Այս հայտարարությունների կապակցությամբ ՌԴ ԱԴԾ-ն քրեական գործ է հարուցել զինված ապստամբության կոչի փաստով: Պահանջում ենք անհապաղ դադարեցնել անօրինական գործողությունները»,- ասված է Ազգային հակաահաբեկչական կոմիտեի հայտարարության մեջ, գրում է ՏԱՍՍ-ը։

Ռուսաստանի նախագահի մամուլի քարտուղար Դմիտրի Պեսկովը հայտնել է, որ Վլադիմիր Պուտինը տեղեկացված է Պրիգոժինի շուրջ ստեղծված իրավիճակի մասին, ձեռնարկվում են բոլոր անհրաժեշտ միջոցները։

Պաշտպանության նախարարությունն ավելի վաղ սադրանք էր անվանել Պրիգոժինի՝ «Վագներ»-ի թիկունքային ճամբարներին հարվածելու մասին հայտարարությունը: Պրիգոժինը հայտարարել է, որ թիկունքից հրթիռային հարվածներ են հասցվել «Վագներ»-ի  ճամբարներին և մեղադրել "ռազմական ղեկավարությանը":