Ռուս սահմանապահների տեղակայումը կոնկրետ վայրերում չի կարող հավերժ լինել․ վարչապետ

Ռուսաստանի սահմանապահ զորքերի բոլոր գործողությունները պետք է համաձայնեցվեն Հայաստանի Ազգային անվտանգության ծառայության հետ: Այս մասին, այսօր՝ մայիսի 22-ին, մամուլի ասուլիսում հայտարարեց ՀՀ վարչապետ Նիկոլ Փաշինյանը՝ մեկնաբանելով տեղեկությունը, որ ռուս սահմանապահները լայնածավալ աշխատանքներ են իրականացնում Մեղրիի մոտ։

«Ռուսական սահմանապահ զորքերի բոլոր գործողությունները պետք է համաձայնեցվեն կառավարության, մասնավորապես՝ Ազգային անվտանգության ծառայության հետ։ Մենք կրկնակի ստուգելու ենք, թե այնտեղ ինչ գործողություններ են կատարվում։ Եթե ​​այդ գործողությունները դուրս գան հայկական կողմի հետ համաձայնեցված աշխատանքից և պարունակեն մարտահրավերներ Հայաստանի տարածքային ամբողջականությանն ու ինքնիշխանությանը, մենք կքննարկենք այդ հարցը։ Տեղական իշխանություններն ու կառավարությունը պետք է համաձայնության գան։ Ելնելով ստեղծված իրավիճակից՝ մենք բոլոր հարցերը մանրամասն կքննարկենք մեր ռուս գործընկերների հետ»,- ընդգծել է Փաշինյանը։

Նա նշեց, որ Հայաստանն, իհարկե, համաձայնել է որոշակի վայրերում ռուս սահմանապահների տեղակայմանը, բայց դա ամենևին չի նշանակում, որ կոնկրետ վայրերում նման տեղակայումը պետք է հավերժ լինի։ «Ելնելով ստեղծված իրավիճակից՝ մենք որոշ հարցեր կքննարկենք մեր ռուս գործընկերների հետ»,- ասել է նա։

Նշենք, որ երկկողմ պայմանագրով ռուս սահմանապահները, ի թիվս այլ հարցերի, պահպանում են Հայաստանի և Իրանի սահմանի մի հատվածը, իսկ անցակետը գտնվում է Մեղրիում։