Լավրով. Հայաստանը նախընտրում է բանակցել ԵՄ-ի հետ, այլ ոչ ՀԱՊԿ դաշնակիցների հետ

Հայաստանը նախընտրում է ԵՄ-ի հետ բանակցել՝ Ադրբեջանի հետ սահման դիտորդական առաքելություն ուղարկելու համար, այլ ոչ թե ՀԱՊԿ դաշնակիցների հետ։ Այս մասին հայտարարել է ՌԴ ԱԳ նախարար Սերգեյ Լավրովը։

«Եկեք չթաքցնենք, որ մենք դժվարություններ ունենք՝ Հայաստանում տիրող իրավիճակի հետ կապված»,- մամուլի ասուլիսի ժամանակ ասել է Լավրովը։

«Մեր հայ ընկերներն առաջ էին մղում գաղափարը, որ անհրաժեշտ է ՀԱՊԿ առաքելություն ուղարկել Ադրբեջանի հետ սահման՝ այնտեղ կայունություն ապահովելու համար։ Երևանի գագաթնաժողովում մենք պայմանավորվեցինք նման փաստաթղթի շուրջ այս առաքելության պարամետրերի վերաբերյալ, բայց այն հնարավոր չեղավ ընդունել, քանի որ հայ գործընկերները սկսեցին պնդել, որ այս փաստաթուղթը պետք է պարունակի Ադրբեջանի խիստ դատապարտում»,- ասել է ՌԴ նախագահը։

Լավրովը հավելել է, որ հայկական կողմին բացատրվել է, որ եթե խոսքն Ադրբեջանին դատապարտելու, հռետորաբանության մասին է, «այստեղ յուրաքանչյուրն ազատ է անել այն, ինչ ուզում է»։

«Այսինքն՝ մենք ուզում ենք ուղարկել ՀԱՊԿ առաքելություն, բայց դա պարտադիր չէ, որ պայմանավորված լինի ինչ-որ արտաքին նշաններով, հայտարարություններով, առավել եւս՝ կոշտ։ Մենք դեռ պատրաստ ենք ՀԱՊԿ առաքելություն ուղարկել Հայաստանի և Ադրբեջանի սահմանին»,- նշել է նախարարը։

Նա նաև նշել է, որ Հայաստանը գերադասում է ԵՄ-ի հետ բանակցել Ադրբեջանի հետ սահման առաքելություն ուղարկելու շուրջ։ Ըստ նրա՝ Հայաստանի իշխանությունների այս մոտեցումը կարող է հակաարդյունավետ լինել։

«Չնայած այն հանգամանքին, որ մենք դաշնակիցներ ենք, որ առաքելությունը պատրաստ է, հայկական կողմը նախընտրում է բանակցություններ վարել ԵՄ-ի հետ, որպեսզի առաքելությունն այնտեղ գտնվի երկարաժամկետ հիմունքներով։ Եթե ​​այդ առաքելությունը ծավալվի առանց Ադրբեջանի համաձայնության, ապա դա կարող է հակաարդյունավետ լինել։ Սահմանին վստահությունն ամրապնդելու փոխարեն դա կարող է լրացուցիչ գրգռիչներ ստեղծել»,- եզրափակել է Լավրովը։