Մենք շատ շահագրգռված ենք, որ այդ պայմանագիրը դառնա իրականություն. Քոչարյան

Ադրբեջանի զորքերի դուրսբերումը ոչ թե պահանջ է, այլ անհրաժեշտություն. այս մասին ԱԺ-ում ճեպազրույցների ժամանակ հայտարարեց ՔՊ խմբակցության պատգամավոր Անդրանիկ Քոչարյանը:

Նա շարունակեց իր գործընկեր Սարգիս Խանդանյանի միտքը, թե Ադրբեջանի զորքերի դուրսբերումը Հայաստանից ՀՀ օրակարգն է ցանկացած հարթակում՝ կարմիր գիծ ու պահանջ:

«Անկախ նրանից, թե բանակցությունները ինչ ընթացք կստանան, ինչ պատկանում է ՀՀ-ին քննարկման նյութ չէ: Մեր ինքնիշխան տարածքում որևէ օտար զինվորի ներկայությունը որևիցե ձևով չի հանդուրժվելու, նրանք պետք է խաղաղ պայմաններում դուրս գան մեր տարածքից»,- ասաց Քոչարյանը:

Ինչ վերաբերում է հարցին, թե որքանով է իրատեսական խաղաղության պայմանագրի մինչև տարեվերջ կնքվելը, Անդրանիկ Քոչարյանն ասաց, որ պայմանագրի կնքնման մեր ցանկությունների մասին վարչապետը խոսել է.

«Մենք շատ շահագրգռված ենք, որ այդ պայմանագիրը դառնա իրականություն»,- շեշտեց նա։

Պատգամավորը հավելեց, որ դեմարկացիայի և դելիմիտացիայի խնդիրները փոխկապակցված են նաև այդ փաստաթղթի հետ, բայց դրանք միաժամանակ լուծում ստանալու պարտադիր պայման չունեն։