Հայաստանը մեր մտերիմ բարեկամն ու ռազմավարական դաշնակիցն է. Պուտին

Նոյեմբերին Երևանում կկայանա Հավաքական անվտանգության պայմանագրի կազմակերպության տարեկան գագաթնաժողովը։ Այս մասին հայտարարել է ՌԴ նախագահ Վլադիմիր Պուտինը՝ ընդունելով Հայաստանի դեսպան Վաղարշակ Հարությունյանի հավատարմագրերը։

«Հայաստանը մեր մտերիմ բարեկամն ու ռազմավարական դաշնակիցն է։ Օգտվելով առիթից՝ ցանկանում եմ շնորհավորել եղբայրական հայ ժողովրդին և երկրի ղեկավարությանը վաղը նշվող Անկախության տոնի առթիվ։ Այս տարի նշվում է միանգամից երկու նշանակալից տարեդարձ՝ մեր երկրների միջև դիվանագիտական ​​հարաբերությունների հաստատման 30-ամյակն ու Բարեկամության, համագործակցության և փոխօգնության հիմնարար պայմանագրի ստորագրման 25-ամյակը։

Ռուսաստանը և Հայաստանը շարունակում են ինտենսիվ քաղաքական երկխոսությունը: Միայն այս տարի ես և Նիկոլ Փաշինյանը երեք անգամ հանդիպել ենք, այդ թվում՝ վերջինը Վլադիվոստոկում՝  տնտեսական համաժողովի ժամանակ։ Նոյեմբերին Երեւանում կանցկացվի Հավաքական անվտանգության պայմանագրի կազմակերպության տարեկան գագաթնաժողովը»,- ասել է Պուտինը։