Հայաստանն ու Արցախը կապող այլընտրանքային ճանապարհի հարցը լիովին լուծված չէ

Հայաստանն ու Արցախը կապող այլընտրանքային ճանապարհի հարցը լիովին լուծված չէ: Այս մասին ասուլիսում հայտարարեց Արցախի արտաքին գործերի նախարար Դավիթ Բաբայանը։

Նրա խոսքով, ճանապարհի կառուցումը բավականին բարդ և երկարատև գործընթաց է, բայց դրա ավարտից հետո էլ այն պետք է ստուգվի։ «Ճանապարհը կզննվի, եթե խնդիրներ առաջանան, դրանք վերացնելու համար անհրաժեշտ կլինի լրացուցիչ աշխատանքներ իրականացնել»,- վստահեցրեց նախարարը։

Բայց Բաբայանը կարծում է, որ դեռ վաղ է խոսել այդ մասին. «Բերձորում, Աղավնոյում մարդիկ են ապրում, տեսնենք՝ ինչպես կզարգանա իրավիճակը»։

Նա նաև հորդորեց հաշվի առնել, որ նոր ճանապարհի կառուցումը նորություն չէ, այս դրույթն արձանագրվել է 2020 թվականի նոյեմբերի 9-ի Եռակողմ հայտարարության մեջ։

«Սա շատ դժվար ժամանակաշրջան է մեր պատմության մեջ, բայց պետք է ամեն ինչ անենք, որպեսզի այս բոլոր հարցերի համապարփակ լուծումն ապահովվի»,- հավելեց Բաբայանը։