Խորհուրդ չեմ տալիս. գլխավոր դատախազը՝ իր պաշտոնին այլ անձանց հավակնությունների մասին

Այս տարվա սեպտեմբերին ավարտվում է Արթուր Դավթյանի վեցամյա պաշտոնավարումը գլխավոր դատախազի պաշտոնում, և լրագրողները փորձել են պարզել, թե արդյոք իշխող «Քաղաքացիական պայմանագիր» կուսակցությունն առաջարկե՞լ է նրան կրկին առաջադրել այս պաշտոնում, և արդյոք նա կցանկանա՞ ստանձնել գլխավոր դատախազի պաշտոնը եւս 6 տարի։

Դավթյանն ընդգծեց, որ այս փուլում վաղաժամ է համարում նման հարցերի պատասխանելը։ «Դեռ ժամանակ կա, բոլոր հարցերի պատասխանները կտրվեն օրենքով սահմանված ժամկետներում։ Հիմա դեռ վաղ է այդ մասին խոսել»,- շեշտեց գլխավոր դատախազը։ Լրագրողների նկատառմանը, թե ինչպես է վերաբերվում այն ​​փաստին, որ արդեն մի շարք անձինք, մասնավորապես՝ ԲԴԽ ղեկավար Գագիկ Ջհանգիրյանը, որոշակի հավակնություններ ունեն այս պաշտոնի համար, Դավթյանը ժպտալով նշեց. «Ես խորհուրդ չեմ տա այն անձանց, ովքեր բավարար չափով չեն պատկերացնում այս պաշտոնի բեռը և պատասխանատվությունը, դիմել դրան։ Ես նրանց չէի նախանձի»։

Լրագրողները հետաքրքրվեցին նաև, թե Դավթյանը մտավախություն ունի՞, որ կորցնելով գլխավոր դատախազի պաշտոնը, ինքը, հետևելով մի շարք նախկին պաշտոնյաների օրինակին, նույնպես քրեական հետապնդման կենթարկվի։ Ի պատասխան՝ գլխավոր դատախազը նշել է. «Ես ոչ միայն նման մտահոգություններ չունեմ, այլ նաև կուզենայի, որ եթե իմ առնչությամբ նման հարցեր առաջանան, դատախազական հսկողություն իրականացնողը մտածեր և վարվեր այնպես, ինչպես ես»։