Պուտինը հայտնել է, որ ուրբաթ օրը հեռախոսազրույց կունենա Նիկոլ Փաշինյանի հետ
ՌԴ նախագահ Վլադիմիր Պուտինը հայտնել է, որ ուրբաթ օրը հեռախոսազրույց կունենա Հայաստանի վարչապետ Նիկոլ Փաշինյանի հետ, փոխանցում է ՏԱՍՍ-ը։
«Այսօր ես հնարավորություն կունենամ Երեւանի մասին Ձեր ջերմ խոսքերը փոխանցել Հայաստանի վարչապետին, ում հետ հեռախոսազրույց կունենանք։ Կարծում եմ՝ նա գոհ կլինի»,- ասել է նա մշակույթի և արվեստի բնագավառում մրցանակակիրների հետ հանդիպմանը։
VERELQ-ը հիշեցնում է, որ մարտի 24-ին ադրբեջանական ԶՈւ ստորաբաժանումները, կոպտորեն խախտելով նոյեմբերի 9-ի եռակողմ հայտարարության պահանջները, ներխուժել են Արցախի Հանրապետությունում Ռուսաստանի Դաշնության խաղաղապահ զորախմբի պատասխանատվության գոտի՝ վերահսկողության տակ վերցնելով Փարուխ գյուղը։
Մարտի 25-ի գիշերը ադրբեջանական ստորաբաժանումները կրակ են բացել ՊԲ ստորաբաժանումների ուղղությամբ՝ կիրառելով ինչպես տարբեր տրամաչափի հրաձգային զինատեսակներ, այնպես էլ հարվածային անօդաչու թռչող սարքեր։ Փոխհրաձգության արդյունքում հակառակորդը կորցրել է առնվազն 5 զինծառայող։
Մինչդեռ մարտի 25-ին ադրբեջանական զինուժի կողմից «Բայրաքթար» տեսակի հարվածային անօդաչու թռչող սարքերի կիրառման արդյունքում հայկական կողմն ունեցել է 2 վիրավոր և 2 զոհ (նաև 5 վիրավոր՝ անցած գիշեր)։