Անվտանգության համակարգի առկայությունը տարածաշրջանում կայունության երաշխիք է. Խաչատուրյան

Կառավարության ուշադրության կենտրոնում են Հայաստանի անվտանգության, երկրի պաշտպանունակության բարձրացման խնդիրները։ Այս մասին այսօր՝ մարտի 2-ին, խորհրդարանում հայտարարեց Հայաստանի նախագահի թեկնածու Վահագն Խաչատուրյանը։

Նրա խոսքով, տնտեսական զարգացումը և սոցիալական խնդիրների լուծումը հնարավոր է ապահովել միայն այն դեպքում, երբ անվտանգության համակարգերը լիարժեք գործարկվեն, ապահովվեն սահմանների անվտանգությունն ու կայունությունը տարածաշրջանում, երբ «չլինի բախումների վտանգ, իսկ սահմանները բաց լինեն»։ «Մեր նպատակը պետք է լինի տարածաշրջանում կայունության ապահովումը, և դրա լավագույն երաշխիքը անվտանգության համակարգի առկայությունն է»,- ասաց Խաչատուրյանը։

Նշելով միասնության և համագործակցության անհրաժեշտությունը թե՛ երկրի ներսում, թե՛ սփյուռքի հետ՝ թեկնածուն նշեց. «Աշխարհում ընթացող գործընթացները մեզ այլ այլընտրանքներ չեն տալիս։ Մենք չպետք է մենակ մնանք: Եվ այս համատեքստում 44-օրյա պատերազմը մեզ կարեւոր դաս տվեց»։