Կան մի շարք չլուծված խնդիրներ, որոնք խոչընդոտում են Հայաստանի զարգացմանը. Խաչատուրյան

Կան մի շարք չլուծված խնդիրներ, որոնք խոչընդոտում են Հայաստանի զարգացմանը։ Այս մասին, այսօր՝ մարտի 2-ին, խորհրդարանում ելույթ ունենալով, ասել է նախագահի թեկնածու Վահագն Խաչատուրյանը։

Այս խնդիրների շարքում Խաչատուրյանը նշել է «տարածաշրջանային համագործակցության սահմանափակումները»՝ մատնանշելով այդ համագործակցության ընդլայնման անհրաժեշտությունը, «խիզախության և պատրաստակամության» առկայությունը, ինչպես նաև իրողությունները սթափ գնահատելու կարողությունը, պատասխանատվությունն ու պատրաստակամությունը։ Խաչատուրյանը մատնանշեց ապագային միտված ծրագրերի անհրաժեշտությունը, որոնք ըստ էության պետք է լինեն ոչ միայն պետական, այլեւ համազգային։

Վերը նշված բոլորին հնարավոր կլինի հասնել միայն այն դեպքում, եթե լինի ընդհանուր ըմբռնում, որ երկիրը կարող է զարգանալ միայն միասնության, ինչպես նաև ընդհանուր հավատի ու հույսի պայմաններում, կարծում է նա։

Խաչատուրյանը մատնանշեց կրթության ոլորտը զարգացնելու և խթանելու անհրաժեշտությունը՝ դա կապելով նաև անվտանգության խնդրի հետ։ Նա նշեց, որ փոքր պետություններն ապահովում են իրենց անվտանգությունը նորարարական մոտեցումներով, և այս համատեքստում չափազանց կարևոր է կրթության ոլորտը։ «Մեր երկարակեցության բանալին հենց այն էր, որ մենք գնահատում էինք գիտությունը, կրթությունը և մշակույթը», - ասաց նա:

Նա նշեց, որ նախագահի աշխատանքի արդյունավետությունը մեծապես կախված է լինելու նաեւ օրենսդիր, գործադիր եւ դատական իշխանությունների աշխատանքից։ «Անհրաժեշտ է արդյունավետ համագործակցության ձեւ գտնել իշխանության բոլոր թեւերի հետ»,- ասաց նա։