ՔՊ-ն պարզաբանել է Երեւանի դիրքորոշումը ԵԽ-ում Ռուսաստանի հարցով քվեարկության վերաբերյալ

Հայաստանն իր դիրքորոշումն է հայտնել Ուկրաինայի իրավիճակի վերաբերյալ, և դա արվել է վարչապետ Նիկոլ Փաշինյանի մակարդակով։ Այս մասին այսօր՝ մարտի 1-ին, ԱԺ-ում ճեպազրույցի ժամանակ հայտարարել է ԱԺ արտաքին հարաբերությունների հանձնաժողովի նախագահ Էդուարդ Աղաջանյանը՝ մեկնաբանելով այն հարցը, թե որքան ժամանակ Հայաստանը ձեռնպահ կմնա իրավիճակի վերաբերյալ իր դիրքորոշումը հայտնելուց։

«Մենք ուշադիր հետեւում ենք իրադարձությունների ընթացքին։ Հայաստանը խորապես մտահոգված է ընթացիկ իրավիճակով։ Որպես ժողովուրդ, որն իր վրա զգացել է պատերազմի բոլոր սարսափները, մենք, բնականաբար, ցավակցում ենք ստեղծված իրավիճակի կապակցությամբ։ Հայաստանը կողմնակից է խաղաղության եւ հակամարտությունների կարգավորմանը բանակցությունների միջոցով։ Ներկա գործընթացները, բնականաբար, մտահոգիչ են, և Հայաստանը, լինելով միջազգային հանրության անդամ, այն դիրքորոշումն ունի, որի մասին ես արդեն նշեցի։

Սակայն Հայաստանը նույնպես մտահոգված է այդ գործընթացների ազդեցությամբ և մեր տարածաշրջանի վրա։ Հայաստանը պետք է պատրաստ լինի այն հետեւանքներին, որոնք կարող են ի հայտ գալ իրադարձությունների այս կամ այն ելքի դեպքում։ Մեզ համար ամենացանկալի ելքը կլիներ ռազմական գործողությունների շուտափույթ դադարեցումը և հարցերի դիվանագիտական լուծումը։ Սակայն սրանք հարցեր են, որոնք, բնականաբար, դուրս են հայկական կողմի վերահսկողությունից։ Միակ բանը, որ մեզ մնում է, մեր տարածաշրջանում ռիսկերը ճիշտ գնահատելն է եւ այդ գնահատականներին համապատասխան առաջ շարժվելը», - հայտարարել է Աղաջանյանը։

«Ինչ վերաբերում է ԵԽ-ում մեր քվեարկությանը, կցանկանայի նշել հետևյալը: Մենք կարծում ենք, որ հակամարտությունը պետք է լուծվի երկխոսության միջոցով, ուստի անհրաժեշտ է համապատասխան հարթակների առկայություն։ Դիվանագիտական խողովակների փակումն ու կրճատումը սահմանափակում է դիվանագիտական լուծումների հնարավորությունները։ Դրա վրա է հիմնված մեր որոշումը քվեարկության ընթացքում»։