ՎՏԲ-Հայաստան Բանկն ունի բավարար իրացվելիություն և կապիտալ. ԿԲ հայտարարությունը

Հայաստանի Կենտրոնական բանկից հայտնում են, որ ներկա իրավիճակում ՎՏԲ-Հայաստան Բանկի ծառայությունները և գործիքները հաճախորդներին հասանելի են լինելու ամբողջությամբ, բացառությամբ փոխանցումների հետ կապված որոշ սահմանափակումների:

ԿԲ-ի մամուլի ծառայությունից հայտնում են, որ Հայաստանում գործող «ՎՏԲ-Հայաստան Բանկ» ՓԲԸ-ն ստեղծված է ՀՀ օրենսդրությամբ, կարգավորվում ու վերահսկվում է ՀՀ կենտրոնական բանկի կողմից։

“Ներկա իրավիճակում ՎՏԲ-Հայաստան Բանկի ծառայությունները և գործիքները հաճախորդներին հասանելի են լինելու ամբողջությամբ, բացառությամբ փոխանցումների հետ կապված որոշ սահմանափակումների, որոնց հետ ավելի մանրամասն կարող եք ծանոթանալ Բանկի www.vtb.am պաշտոնական կայքում”, - ասված է հայտարարության մեջ:

Նշվում է, որ ՎՏԲ-Հայաստան Բանկն ունի բավարար իրացվելիություն և կապիտալ սպասարկելու իր բոլոր պարտավորությունները։ “Բանկին հասանելի են նաև Կենտրոնական բանկի կողմից իրացվելիության տրամադրման մշտական հնարավորության գործիքները”, - ասված է հայտարարության մեջ:

Նշենք, որ Ամերիկյան կառավարությունն ու Մեծ Բրիտանիան պատժամիջոցների շրջանակում սառեցրել են ռուսական բանկերի, այդ թվում՝ ՎՏԲ բանկի ակտիվները։