Մամիջանյան. 44-օրյա պատերազմի ժամանակ Հայաստանը պարտավոր էր ճանաչել Արցախի անկախությունը

Արտաքին գործերի նախարարության հայտարարությունը, թե Դոնեցկի և Լուգանսկի ժողովրդական հանարապետությունների ճանաչման հարցը Հայաստանի օրակարգում չկա, իշխանությունների վարած արտաքին քաղաքականության թուլության հերթական վկայությունն է։

Այս մասին, այսօր՝ փետրվարի 23-ին, խորհրդարանում լրագրողների հետ հանդիպման ժամանակ ասաց ընդդիմադիր դաշինքի «Պատիվ ունեմ» խմբակցության քարտուղար Հայկ Մամիջանյանը։

Նրա խոսքով, Հայաստանի արտաքին քաղաքականությունը «լի է հակապետական ​​սխալներով»: «Վերջին օրերին Ռուսաստանի Պետդումայի և ՌԴ նախագահի գործողությունները ցույց տվեցին, թե ինչ պետք է աներ Հայաստանը 44-օրյա պատերազմի ժամանակ»,- ասաց Մամիջանյանը։ Իսկ Հայաստանը 44-օրյա պատերազմի ժամանակ պարզապես պարտավոր էր ճանաչել Արցախի անկախությունը, կարծում է ընդդիմադիրը։

Նա հիշեց, որ 2016 թվականի ապրիլյան քառօրյա պատերազմի ժամանակ այն ժամանակվա նախագահ Սերժ Սարգսյանը հրավիրել է ԵԱՀԿ երկրների դեսպաններին և հայտարարել, որ եթե ռազմական գործողությունները շարունակվեն, Հայաստանը կճանաչի Արցախի անկախությունը։ Մամիջանյանը հավելեց նաեւ, որ ՌԴ նախագահը իր ասուլիսների ժամանակ բազմիցս նշել է, որ անգամ Հայաստանը չի ճանաչել Արցախի անկախությունը։ «Այն, որ 44-օրյա պատերազմի ժամանակ չճանաչվեց Արցախի անկախությունը, չի տեղավորվում տրամաբանության շրջանակում»,- ասաց նա։

Ռուսաստանի կողմից ԴԺՀ-ի և ԼԺՀ-ի անկախության ճանաչումը, ըստ պատգամավորի, «ժողովուրդների ինքնորոշման իրավունքի ևս մեկ պնդում է միջազգային քաղաքականության մեջ»։ Միևնույն ժամանակ, այս ճանաչումը ակնհայտորեն ցույց է տալիս Հայաստանի իշխանությունների կողմից 44-օրյա պատերազմի ընթացքում թույլ տրված կոպիտ սխալներից մեկը։