Իշխող ուժը չի պաշտպանի «Շուշիի հռչակագիրը» դատապարտող հայտարարության նախագիծը. Արսենյան

Իշխող "Քաղաքացիական պայմանագիր" կուսակցության խմբակցությունը չի աջակցի "Հայաստան" ընդդիմադիր դաշինքի ներկայացրած Ազգային ժողովի հայտարարության նախագծին, որով խորհրդարանը դատապարտում է "Շուշիի հռչակագրի" վավերացումը: Այս մասին այսօր՝ փետրվարի 21-ին, ԱԺ արտաքին հարաբերությունների մշտական հանձնաժողովում քննարկման ժամանակ ասաց "Քաղաքացիական պայմանագիր" խմբակցության անդամ Գուրգեն Արսենյանը։

Հիմնավորելով իշխող ուժի դիրքորոշումը՝ Արսենյանը նշել է, որ Հայաստանի ԱԳՆ-ն դեռ ութ ամիս առաջ է արձագանքել "Շուշիի Հռչակագրի" բովանդակությանը՝ հանդես գալով փաստաթղթի հայտարարությամբ եւ մեկնաբանություններով: Ընդդիմության առաջարկած ԱԺ հայտարարության նախագիծը, շարունակեց պատգամավորը, փաստացի կրկնությունն է ԱԳՆ հայտարարություններում եւ մեկնաբանություններում արտացոլված թեզերի: Արսենյանը "անտրամաբանական" է համարում ընդդիմության հիմնավորումն այն մասին, որ խորհրդարանը պետք է այդ հայտարարությունն ընդունի ի պատասխան Թուրքիայի և Ադրբեջանի խորհրդարանների կողմից վերոնշյալ փաստաթղթի վավերացմանը։ Նա ընդգծել է, որ խորհրդարանն ու ԱԳՆ-ն "պետք է վարեն եւ վարեն միասնական արտաքին քաղաքականություն":

Արսենյանը հիշեցրել է, որ Հայաստանի խորհրդարանը հավանություն է տվել Կառավարության ծրագրին, ըստ որի Հայաստանը գնում է տարածաշրջանում խաղաղության հաստատման ճանապարհով: Նա նշել է, որ երկրի իշխանությունները վարում են այնպիսի արտաքին քաղաքականություն, որը բացասական ազդեցություն չունենա խաղաղության հաստատման գործընթացի վրա եւ հաշվի կառնի հնարավորության բոլոր ռիսկերը: Պատգամավորն ընդգծեց, որ Ազգային ժողովի զինանոցը չի սահմանափակվում միայն հայտարարություններով և այդ տեսանկյունից իշխող ուժը ողջունել է "Հայաստան" դաշինքի որոշումը՝ վերսկսել աշխատանքը միջազգային կառույցներում և կոչ արել ընդդիմությանը ակտիվացնել ջանքերը երկրի շահերը պաշտպանելու համար: