«Հայաստան» խմբակցությունը տուգանքների բալային համակարգի հարցով կդիմի ՍԴ

Փետրվարի 8-ին հերթական նիստում խորհրդարանն առաջին ընթերցմամբ քննարկեց «Հայաստան» խմբակցության հեղինակած «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» նախագիծը:

Տուգանքների բալային համակարգի փոփոխության վերաբերյալ իրենց մոտեցումները փաստարկված ներկայացրել են հիմնական զեկուցող պատգամավոր Գեղամ Մանուկյանը, հարակից զեկուցող ԱԺ պաշտպանության եւ անվտանգության հարցերի մշտական հանձնաժողովի անդամ Արմեն Խաչատրյանը:

Կառավարության եզրակացությունը ներկայացրեց ՀՀ ոստիկանության պետի տեղակալ Արա Ֆիդանյանը՝ նշելով, որ գործող դրույթները լիովին համապատասխանում են ինչպես միջազգային, այնպես էլ ներպետական իրավական նորմերին: Նա առաջարկեց անփոփոխ թողնել օրենսգրքի նախագծի շրջանակներում քննարկվող հոդվածները։

Նախագծի վերաբերյալ հիմնավորված ելույթ ունեցան նաեւ «Քաղաքացիական պայմանագիր» խմբակցության պատգամավորները:

«Հայաստան» խմբակցության անունից ելույթ ունեցած Արծվիկ Մինասյանը նշեց, որ միավորների հաշվարկման համակարգում խնդիրներ կան, և ներկայացված նախագիծն ուղղված է այն բարձրացնելուն և լուծելուն: Պատգամավորն ընդգծեց, որ խմբակցությունը ևս դիմելու է Սահմանադրական դատարան:

Վերջում Ա.Ֆիդանյանը, Ա. Խաչատրյանը եւ Գ. Մանուկյանը սպառիչ պատասխանեցին պատգամավորների բարձրացրած հարցերին: