Ադրբեջանցի զինծառայողները բողոքի ակցիա են անցկացրել մարտական պարգևներից զրկվելու համար

Ադրբեջանական 44-օրյա պատերազմի մի խումբ մասնակիցներ երկուշաբթի օրը բողոքի ակցիա են անցկացրել Ադրբեջանի պաշտպանության նախարարության շենքի դիմաց:

Ինչպես հայտնում է Turan գործակալությունը, զինծառայողները դժգոհություն են հայտնել իրենց մարտական պարգևներից զրկվելու կապակցությամբ։

«Մեր ծառայությունները չեն գնահատել, չնայած նախագահ Իլհամ Ալիևի հանձնարարությանը՝ պարգևատրել պատերազմի մասնակիցներին, ուշադրություն դարձնել նրանց, հոգատարություն ցուցաբերել։ Նրանք, ովքեր ծառայել են թիկունքում, մեդալներ են ստացել, իսկ մեր մասին մոռացել են», - ասաց ակցիայի մասնակիցներից մեկը։

Ցուցարարների մոտ հայտնված ՊՆ ներկայացուցիչը խոստացել է հետաքննել հարցը։ Ակցիան ավարտվեց առանց միջադեպերի։