ԵԱՏՄ պետությունները գազի ընդհանուր շուկայի ճանապարհին են

ԵԱՏՄ գազի ընդհանուր շուկայի ստեղծման չհամաձայնեցված զգայուն հարցերը քննարկել են անդամ երկրների էներգետիկայի ոլորտում լիազորված մարմինների ղեկավարները ԵՏՀ էներգետիկայի և ենթակառուցվածքի նախարար Թեմիրբեկ Ասանբեկովի նախագահությամբ կայացած բանակցություններում:

Միջոցառումը կայացել է նախօրեին՝ դեկտեմբերի 23-ին, Եվրասիական տնտեսական հանձնաժողովի հարթակում։ Այս մասին հայտնում է ԵՏՀ մամուլի ծառայությունը։

Բացելով միջոցառումը՝ ԵՏՀ նախարարն ընդգծել է ԵԱՏՄ գազի ընդհանուր շուկայի ձևավորման մասին միջազգային պայմանագրի նախագծերի և անդամ պետությունների տարածքներում տեղակայված գազատրանսպորտային համակարգերի հասանելիության միասնական կանոնների համաձայնեցման շուրջ ակտիվ ընթացող երկխոսության կարևորությունը: Նա կարևորել է նախկինում բարձր մակարդակով ձեռք բերված պայմանավորվածությունների անվերապահ կատարումը։

Խորհրդակցության մասնակիցները հաստատել են ընդհանուր շուկայում գազի փոխադրման ծառայությունների ոչ խտրական և թափանցիկ գնահատում ապահովելու անհրաժեշտությունը, կարծիքներ են փոխանակել երկկողմ միջազգային պայմանագրերի գործողության և շուկայի մասնակիցների որոշման առանձնահատկությունների վերաբերյալ:

Կողմերը պատրաստակամություն են հայտնել կարգավորել գազի մատակարարման հատկապես զգայուն հարցերը եւ պայմանավորվել են շարունակել առարկայական խորհրդակցությունները միջազգային պայմանագրի նախագծերի առանձին դրույթների եւ մուտքի միասնական կանոնների համաձայնեցման շուրջ:

Վերջնական որոշումը Եվրասիական տնտեսական բարձրագույն խորհրդի կողմից կընդունվի հաջորդ տարվա գարնանը։