ՀՀ պաշտպանության նախարար Սուրեն Պապիկյանը հանդիպում է ունեցել Հայաստանում Իտալիայի նորանշանակ արտակարգ և լիազոր դեսպան Ալեսսանդրո Ֆերրանտիի հետ։ Փետրվարի 3-ին կայացած հանդիպման ընթացքում կողմերը քննարկել են երկու երկրների միջև պաշտպանական ոլորտում համագործակցության ներկա վիճակն ու հեռանկարները։ Ինչպես տեղեկացնում է ՀՀ ՊՆ մամուլի ծառայությունը, նախարար Պապիկյանը շնորհավորել է դեսպանին պաշտոնը ստանձնելու կապակցությամբ և հաջողություններ մաղթել հայ-իտալական հարաբերությունների զարգացման գործում։ Զրույցի ընթացքում հատուկ ուշադրություն է դարձվել տարածաշրջանային և միջազգային անվտանգության հարցերին, ինչպես նաև երկկողմ ռազմական համագործակցության ընդլայնման հեռանկարներին։
