Հայաստանում կորոնավիրուսային իրավիճակով և առողջապահական ռիսկերով պայմանավորված, Ջահերով երթն այս տարի չի անցկացվի ավանդական ձևաչափով։ Այդ մասին ասվում է ՀՅԴ Հայաստանի երիտասարդական միության հայտարարության մեջ։ Ելնելով ստեղծված իրավիճակից՝ ՀՅԴ Հայաստանի երիտասարդական և ՀՅԴ «Նիկոլ Աղբալյան» ուսանողական միությունները կոչ են անում ապրիլի 23-ին և 24-ին՝ ժամը 21։00-ից վառել և բնակարանների պատուհաններին դնել մոմեր՝ ի հիշատակ Հայոց ցեղասպանության զոհերի և հայերի պահանջատիրության։ «Հայոց ցեղասպանության տարելիցի առթիվ իրավիճակին համապատասխանեցված մեր կողմից իրականացվող այլ միջոցառումների մասին կտեղեկացնենք առաջիկայում»,- ասվում է ՀՅԴ ՀԵՄ հայտարարության մեջ։ Ավելի վաղ հայտնի դարձավ, որ Ապրիլի 24-ին՝ Ցեղասպանության զոհերի հիշատակի օրը, միայն արարողակարգային միջոցառումներ կլինեն։
