Լեռնային Ղարաբաղի Հանրապետության իշխանությունները կարծում են, որ Արցախում մարտական գործողություններին մասնակցած գրոհայինները կարող էին տեղափոխվել Ուկրաինա: Այս մասին "ՌԻԱ Նովոստի"-ին տված հարցազրույցում ասել է ԼՂՀ պետական նախարար Արտակ Բեգլարյանը։ "Մեծ հավանականություն կա, որ այդ ահաբեկչական խմբավորումներն այսօր Ուկրաինայում կռվում են Ռուսաստանի դեմ", - ասել է Բեգլարյանը: Մինչ այդ նա նշել է, որ ԼՂՀ իշխանությունները տեղեկատվություն ունեն այն մասին, որ Ադրբեջանի կողմից կռվել են 5-ից 7 հազար սիրիացի և լիբիացի գրոհայիններ, պատերազմից հետո մի մասը կարող էր մնալ Ադրբեջանի գրաված տարածքներում: "Նրանք այստեղ են եկել փողով պատերազմելու, այդ թվում՝ հակաքրիստոնեական գաղափարներով", - նշել է Բեգլարյանը՝ ընդգծելով, որ ԼՂՀ իշխանությունները նաեւ տվյալներ ունեն այն մասին, որ այդ ահաբեկչական խմբավորումները Սիրիայում կռվել են ռուսական զորքերի դեմ, Իսկ Ղարաբաղ նրանց հավաքագրելիս օգտագործվել են նաեւ հակառուսական կարգախոսներ։