Ադրբեջանը քառօրյա պատերազմի թույլտվություն ունեցել է, ընդ որում ով այդ թույլտվությունը տվել է, ասել է՝ «վերցրու այնքան, որքան կարող ես: Մենք թույլ չենք տա, որ դու պարտվես»: Այս մասին Ռազմավարական և ազգային հետազոտությունների հայկական կենտրոնում (ՌԱՀՀԿ) ընթացող քննարկման ժամանակ այսօր հայտարարեց Լեռնային Ղարաբաղի նախկին արտգործնախարար Արման Մելիքյանը: Արդյունքում, շարունակեց բանախոսը, Ադրբեջանը փորձեց վերցնել որքան կարող էր, բայց ստացավ այնքան, որքան թույլ տվեցին: Նպատակը նա էր, որպեսզի Ադրբեջանը չպարտվի և ինչ-որ տարածքներ, այնուամենայնիվ, իր վերահսկողության տակ առնի: Ու թեև տարածքային ձեռքբերումները մեծ չէին, բայց փոխարենը դրանց քաղաքական նշանակությունն էր հսկայական` քառօրյա պատերազմի հիմնական հետևանքը հենց քաղաքական է. «Դրա առաջին հետևանքն այն էր, որ հայկական կողմերը սկսեցին տարածքներ զիջելու գործընթացը՝ հրաժարվելով կորցրածը վերադարձնելուց: Կարծում եմ, որ Արցախի Սահմանադրությունը ընդունելուց հետո «անվտանգության գոտի» եզրույթը դրանից պետք է առհասարակ հանված լիներ, մինչդեռ Սերժ Սարգսյանը խոսեց ինչ-որ անհասկանալի անվտանգության գոտու, կորցված ինչ-որ քառակուսի մետրերի կամ հեկտարների մասին: Գուցե ես կարող եմ հասկանալ պատերազմական գործողությունների ժամանակ այդ դիրքերը չվերադարձնելու պարոն Սարգսյանի ցանկությունը կամ նպատակը, բայց երբ այդ նպատակն ամրագրվում է նաև քաղաքական մակարդակում, այսինքն` հրաժարումով, դա արդեն նշանակում է, որ մարդիկ պարզապես տարածքները հանձնելու դուռը բացել են և այն փակելու որևէ նպատակ անգամ չունեն, սա է մեր մեծագույն խնդիրը»,- հայտարարեց Մելիքյանը: Շարունակելով նույն հարցի շուրջ նա ընդգծեց, որ իր համար թերևս հասկանալի կլիներ, եթե գործեր «կարգավիճակ` տարածքների դիմաց» սկզբունքը, բայց, ինչպես տեսնում ենք, տարածքներ հանձնվեցին առանց կարգավիճակի հստակեցման և որ ամենակարևորն է` պահանջ չկար տարածքները քաղաքական երկխոսությամբ վերադարձնելու: