Թուրքիայի արտգործնախարար Մևլութ Չավուշօղլուն Անկարայում հանդիպել է ԵԱՀԿ Մինսկի խմբի համանախագահների` Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպշիկի հետ: Չավուշօղլուն այդ մասին տեղեկացրել է Twitter իր միկրոբլոգում` հրապարակելով նաև լուսանկար: «Հանդիպեցի Անկարայում համանախագահների հետ և ևս մեկ անգամ հայտնեցի Թուրքիայի աջակցությունը Մինսկի խմբի գործունեությանը», - գրառել է նա:
Հիշեցնենք, որ Թուրքիան Հայաստանի, Ադրբեջանի, Ամերիկայի Միացյալ Նահանգների, Ֆրանսիայի, Ռուսաստանի, Բելառուսի, Գերմանիայի, Իտալիայի, Շվեդիայի, Ֆինլանդիայի հետ մտնում է ԵԱՀՄ ՄԽ կազմի մեջ:
Ժամանակին դիվանագիտական թեժ պայքար է ընթացել նաեւ այն հարցի շուրջ, թե որ երկրները պետք է ընդգրկվեն Մինսկի խմբի կազմում: Մասնավորապես, հայկական կողմը դեմ էր Թուրքիայի ներգրավմանը, ինչին բնականաբար կողմ էր Ադրբեջանը:
Բաքուն, իր հերթին, չէր ցանկանում խմբում տեսնել Ֆրանսիային եւ Իտալիային` միաժամանակ առաջարկելով Մեծ Բրիտանիայի թեկնածությունը: Ի վերջո, երկարատեւ բանակցություններից եւ «առեւտրից» հետո, կողմերը հանգեցին վերոնշյալ երկրների թեկնածությանը:
Թուրքիան, սակայն չի մտնում ԵԱՀՄ Մինսկի խմբի եռանախագահության կազմ` ի դեմս ԱՄՆ-ի, Ռուսաստանի եւ Ֆրանսիայի: Հայաստանը կտրականապես դեմ է ԼՂ համակամարտության կարգավորմանը Թուրքիայի մասնակցության որեւէ ձեւաչափին:
