Հայաստանում ամենաբարձր մակարդակում բազմիցս անդրադարձ է կատարվել Ադրբեջանին մատակարարվող Ռուսաստանի սպառազինության խնդրին, եւս մեկ անգամ այդ ամենը կրկնելու կարիք չկա։ Այս մասին հունվարի 29-ի 2017 թ.-ը ամփոփող ասուլիսում հայտարարեց ՀՀ արտաքին գործերի նախարար Էդվարդ Նալբանդյանը։ Նրա խոսքով, կարիք չկա այս խնդրին եւս մեկ անգամ անդրադառնալու համար, քանի որ իրեն հայտնի է, թե ինչու է այդպիսի շեշտադրումներով թեման շահարկվում Ադրբեջանի քարոզչությունը: Նա միայն հավելեց, որ Հայաստանն անում է ամեն ինչ հավասարակշռությունը պահելու համար՝ ներառյալ օգտագործելով այն հնարավորությունները, որոնք բխում են Ռուսաստանի հետ հարաբերությունից, օգտագործելով դաշնակցային իրողությունները: Այդ իրողությունների շրջանակում նա հիշեցրեց ՀՀ-ում ռուսական ռազմակայանի մասին պայմանագրում 2010 թվականին արված փոփոխությունը՝ 5-րդ արձանագրությունը։ Ըստ այդմ, Հայաստանի զինուժի հետ միասին Ռուսաստանը պարտավորվում է ստանձնել ՀՀ-ի անվտանգության դերակատարությունը։ «Նաեւ պարտավորություն կա տրամադրել Հայաստանին զենք եւ ժամանակակից սպառազինություն, որ բխում է այդ դրույթից»,- ասաց նախարարը: Նալբանդյանին ակնհայտ եւ հայտնի է, որ Ռուսաստանը կարեւոր դերակատարություն ունի տարածաշրջանում անվտանգության եւ կայունության ապահովման հարցում։ «Սա վերաբերում է ՌԴ-ի դերակատարությունը ոչ միայն ԵԱՀԿ Մինսկի խմբի շրջանակում»,- ընդգծեց նա: Վերջերս Դավոսի միջազգային տնտեսական համաժողովի շրջանակում Ադրբեջանի նախագահ Իլհամ Ալիեւը հայտարարել էր, որ վերջին տարիներին Մոսկվայի հետ կնքել են 5 մլրդ դոլարի ռազմական մատակարարումների վերաբերյալ պայմանագիր, որոնց մեծ մասն իրականացվել է։ Նա նաեւ տեղեկացրել էր, որ այժմ ռուսական կողմի հետ քննարկում են ռազմական բնույթի նոր գործարքներ։ Իսկ Հայաստանը ՀԱՊԿ-ի շրջանակում ստանում է ռուսական արտադրության սպառազինություն ներքին գներով, ինչը մի քանի անգամ զիջում է շուկայականին։ ՀՀ-ը վերջին երկու տարում ՌԴ-ից շուրջ 250 մլն դոլարի ռազմական վարկ ստացավ այդ երկրի արտադարության նորագույն զինատեսակներ ձեռք բերելու համար։ Հայաստանը նաեւ միակ պետությունն է, որին Ռուսաստանը տրամադրել նաեւ «Իսկանդեր Է» օպերատիվ տակտիկական հրթիռային համակարգեր։
