Եվրոպայի խորհրդի անդամ պետությունների խորհրդարանների նախագահների համաժողովի շրջանակներում հոկտեմբերի 24-ին Ստրասբուրգում ԱԺ նախագահ Արարատ Միրզոյանը հանդիպել է Եվրոպայի խորհրդի խորհրդարանական վեհաժողովի նախագահ Լիլիան Մորի Պասքիեի հետ։ Շնորհավորելով Եվրոպայի խորհրդի հիմնադրման 70-ամյակի կապակցությամբ՝ Միրզոյանը նշել է, որ մարտահրավերներին դիմակայելու եւ լուծումներ փնտրելու ճանապարհին Հայաստանը շարունակելու է ապավինել Եվրոպայի խորհրդի աջակցությանը։ Այս տարվա մարտ ամսին Երեւանում կայացած հանդիպումից ի վեր Հայաստանը մի շարք հաստատակամ քայլեր է կատարել դատաիրավական բարեփոխումների օրակարգի շրջանակներում: Հանդիպման ընթացքում ԱԺ նախագահն անդրադարձել է նաեւ Սահմանադրական դատարանի շուրջ ստեղծված իրավիճակին։ Նշել է, որ Հայաստանի խորհրդարանն այժմ ձեռնամուխ է եղել ընտրական օրենսգրքի եւ կուսակցությունների մասին օրենքի բարեփոխմանը։ Լիլիան Մորի Պասքիեին, ողջունելով Հայաստանի իշխանությունների պատրաստակամությունը իրենց միջազգային պատավորությունների կատարման ճանապարհին, իր հերթին պատրաստակամություն էհայտնել շարունակել աջակցությունը Հայաստանի ժողովրդավարացման գործընթացին։ Լիլիան Մորի Պասքիեի խնդրանքով Արարատ Միրզոյանը նաեւ անդրադարձել է Հայաստանի կողմից կանանց և երեխաների նկատմամբ բռնությունը կանխելուն ուղղված գործընթացին։
