Երևանի ավտոբուսներում և միկրոավտոբուսներում հնարավոր է վճարում կատարել բանկային քարտերով, ասաց ՀՀ փոխքաղաքապետ Սուրեն Գրիգորյանն այսօր կայացած գործակարգավարական խորհրդակցության ընթացքում։ «Արդեն իսկ վերգետնյա շարժակազմում, այսինքն ավտոբուսներում և միկրոավտոբուսներում, հնարավոր է վճարում կատարել ՀՀ բանկերի կողմից թողարկված բանկային քարտերի միջոցով», – ասաց Գրիգորյանը։ Նա նշեց, որ այս գործարքը միջնորդավճարներ չի ենթադրում։ Գրիգորյանը նաև հայտնեց, որ ծրագիրը իրականացնող կազմակերպության կողմից («TelCell» ընկերություն) միջնորդավճարները վճարվում են։ «Այս շաբաթվա ընթացքում այս գործարկումից հետո եթե ինչ–որ խնդիրներ ի հայտ գան, խնդրում ենք քաղաքացիներին դրանց մասին հայտնել, դրանք կստանան շուտափույթ լուծում, որից հետո վճարման այս հնարավորությունը կգործարկվի նաև մետրոյում», – ասաց Գրիգորյանը։
