Կիլիկիո կաթողիկոս Արամ Առաջինը և Հռոմի Պապ Ֆրանցիսկոս Առաջինը հունիսի 12-ին, Հռոմի Սուրբ Աթոռում կայացած հանդիպմանը քննարկել են բռնի տեղահանված հայ բնակչության Լեռնային Ղարաբաղ վերադարձի և հայ գերիների ադրբեջանական գերությունից ազատման հարցը։ Ինչպես հայտնում են Կիլիկիո կաթողիկոսությունից, նրանք խոսել են նաև Վատիկանի Երրորդ ժողով հրավիրելու հրամայականի մասին՝ ոչ կաթոլիկ եկեղեցիների ակտիվ մասնակցությամբ։ Օրակարգում է եղել նաև միջեկեղեցական հարաբերություններն ավելի խթանելու անհրաժեշտությունը։ Նշվում է, որ Արամ Առաջինը հրավիրվել էր Հռոմ՝ դասախոսություն կարդալու կրոնի և աշխարհաքաղաքականության և Մերձավոր Արևելքում նրանց փոխձևավորման մասին։
