Անհետ կորած համարվող զինծառայողների ծնողներն ու հարազատները այսօր՝ դեկտեմբերի 16-ին, կոտրել են Պաշտպանության նախարարության դուռը և մտել վարչական համալիրի տարածք: Նրանք այսօր առավոտից հավաքվել և բողոքի ակցիան էին իրականացնում Հայաստանի պաշտպանության նախարարության շենքի մոտ: Ծնողները և հարազատները վերջին օրերին շրջանառվող լուրերից, տեսանյութերից տեղեկացել են, որ հայ զինծառայողների շրջանում կան նոր գերեվարվածներ: Նախօրեին տեղեկություններ էին տարածվել, որ 100-ից ավելի զինծառայողներ գերեվարվել են Արցախի Հադրութի շրջանի Հին Թաղել եւ Խծաբերդ գյուղերի ուղղությամբ: Տեղեկութունը չեն հերքել նաև Պաշտպանության բանակի մամուլի ծառայությունից՝ նշելով, որ երեկ երեկոյան, դեռևս անհայտ պայմաններում, կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված ԱՀ ՊԲ մի քանի մարտական դիրքերի անձնակազմի հետ։ Ծնորղները նշում են, որ այսօր կմնան նախարարությունում այնքան, մինչև չձեռնարկվեն գործուն քայլեր՝ իրենց որդիների հայտնաբերման ուղղությամբ: Նշենք, որ Շիրակի մարզի տարբեր բնակավայրերի հարյուրավոր բնակիչներ, որոնք տեղեկացել են իրենց հարազատների գերեվարության մասին, Շիրակի մարզպետարանի դիմաց բողոքի ակցիա են իրականացնում:
