Հայաստանի և Ադրբեջանի ղեկավարներ Նիկոլ Փաշինյանը և Իլհամ Ալիևը Եվրոպական խորհրդի նախագահ Շառլ Միշելի հետ եռակողմ հանդիպման ժամանակ վերահաստատել են իրենց հանձնառությունը իրականացնել Ղարաբաղի վերաբերյալ 2020 թվականի նոյեմբերի 9-ի և 2021 թվականի նոյեմբերի 26-ի Ռուսաստանի միջնորդությամբ ձեռք բերված պայմանավորվածությունները: Այս մասին ասվում է Միշելի հայտարարության մեջ, որը տարածվել է Բրյուսելում բանակցությունների արդյունքներով, փոխանցում է ՏԱՍՍ-ը։ «Շառլ Միշելը շեշտեց, որ հումանիտար հիմնախնդիրների լուծումը շատ կարևոր է: Նա կոչ արեց լիարժեք և շուտափույթ լուծում տալ բոլոր հումանիտար խնդիրներին, ինչպիսիք են՝ բռնի պահվող անձանց ազատ արձակումը և անհայտ կորածների ճակատագրի լուծումը, միաժամանակ ընդունելով, որ երկու կողմերի մարդասիրական քայլերը նույնպես նպաստում են վստահության ամրապնդմանն ու օգնում խաղաղության և հաշտեցման համար նպաստավոր միջավայրի ստեղծմանը»,- ասված է հայտարարության մեջ։ Միշելն ասել է, որ «ԵՄ-ն կշարունակի աջակցել ականազերծման ջանքերին, այդ թվում՝ հակամարտությունից տուժած բնակչությանը վերականգնման և վերակառուցման համար փորձագիտական խորհրդատվություն տրամադրելու միջոցով»: «ԵՄ-ն նույնպես կշարունակի աջակցել Հայաստանի և Ադրբեջանի միջև վստահության ամրապնդման միջոցառումներին»,- հավելել է Եվրոպական խորհրդի նախագահը։ «Առաջնորդները նաև քննարկել են ԵՄ-ի մտադրությունը՝ ստեղծել տնտեսական խորհրդատվական հարթակ՝ վստահություն ձևավորելու, խաղաղ գոյակցությունը խթանելու և տարածաշրջանում տնտեսական համագործակցությունն ընդլայնելու համար»,- ասվում է հայտարարության մեջ: Նաև Հայաստանի և Ադրբեջանի ղեկավարները որոշել են անցնել երկաթուղային գծերի վերականգնմանը՝ սահմանային և մաքսային հսկողության միջոցներով։ Շառլ Միշելի հայտարարության համաձայն՝ Եվրամիությունը փորձագետների առաքելություն կտրամադրի Հայաստանի և Ադրբեջանի միջև սահմանների սահմանագծման և սահմանազատման հարցերը լուծելու համար։ Փաստաթղթում ասվում է, որ Փաշինյանը և Ալիևը «համաձայնել են, որ երկու երկրների միջև պետական սահմանի սահմանագծան և սահմանազատման շուրջ բանակցությունների ծրագրված մեկնարկի համատեքստում անհրաժեշտ կլինի հետագա շոշափելի քայլեր ձեռնարկել՝ տեղում լարվածությունը թուլացնելու համար և ապահովելով բարենպաստ մթնոլորտ»։ «Շառլ Միշելը և՛ Երևանին, և՛ Բաքվին կոչ է արել բարեխղճորեն աշխատել իրավիճակի դեէսկալացիայի ուղղությամբ: Նա ընդգծել է, որ ուժերի պատշաճ հեռավորության ապահովումը կարևոր տարր է միջադեպերի կանխարգելման գործում», - ասվում է հայտարարության մեջ:
