Ռուսական խաղաղապահ զորախմբի զինծառայողները Ամանորի եւ Սուրբ Ծննդյան տոների նախաշեմին մեկ օրում ապահովել են մոտ 1000 ավտոմեքենաների անվտանգ անցումը Լեռնային Ղարաբաղ եւ հակառակ ուղղությամբ՝ դիտակետերով եւ Լաչինի միջանցքով: Այս մասին հայտնում է Ռուսաստանի Պաշտպանության նախարարությունը։ Ռուսական խաղաղապահ զորախմբի զինծառայողը պատմել է իր ծառայության մեկնարկի եւ Լեռնային Ղարաբաղում դիտորդական պաշտոնում խաղաղապահ ուժերի առաջադրանքների կատարման մասին: «Ռուս խաղաղապահներն ապահովում են անցակետերի միջոցով տարանցիկ ավտոտրանսպորտի անվտանգ անցումը: Հնարավոր սադրանքների նպատակով զննման են ենթակա բոլոր ավտոտրանսպորտային միջոցները, իսկ անհրաժեշտության դեպքում կատարվում է դրանց զննումը: Ամանորի նախաշեմին զգալիորեն ուժեղանում է ավտոմոբիլային տրանսպորտի հոսքը, ինչը մեզանից պահանջում է առանձնահատուկ ուշադրություն եւ զգոնություն ՝ հրադադարի ռեժիմի պահպանման վերահսկողության համար», - պատմել է ռուսական խաղաղապահ զորախմբի ներկայացուցիչ Դանիիլ Ռոմանովը։ Ռուս խաղաղապահներն ապահովում են իրադրության շուրջօրյա մոնիթորինգ եւ հրադադարի ռեժիմի պահպանման վերահսկողություն: Ռուսաստանի խաղաղապահ ուժերի քսանյոթ դիտակետերը տեղակայված են Լաչինի միջանցքում եւ Լեռնային Ղարաբաղում սահմանազատման գծի ողջ երկայնքով: Դիտորդական դիրքերում ծառայություն իրականացնելու համար ռուս խաղաղապահները հանդերձված են «Ռատնիկ» կոստյումներով: Դիտակետերը հագեցած են ժամանակակից լուսադիոդային լուսարձակներով, անխափան էլեկտրասնուցման աղբյուրներով և տեսահսկման բացօթյա գմբեթավոր տեսախցիկներով: Ռուսաստանի նախագահի, Ադրբեջանի նախագահի եւ Հայաստանի վարչապետի համատեղ հայտարարության մեջ նշված պայմանավորվածություններին համապատասխան, 2020 թվականի նոյեմբերի 10-ին Մոսկվայի ժամանակով 00:00-ից հայտարարվել է Լեռնային Ղարաբաղում կրակի եւ բոլոր ռազմական գործողությունների լիակատար դադարեցում: Ռուսական խաղաղապահ զորախմբի պատասխանատվության գոտում հնարավոր միջադեպերի կանխման ջանքերը համակարգելու համար շարունակական փոխգործակցություն է պահպանվում Ադրբեջանի եւ Հայաստանի զինված ուժերի գլխավոր շտաբների հետ: