Վրաստանը, հաշվի առնելով երկրի ազգային շահերն ու ժողովրդի շահերը, չի ծրագրում միանալ Ռուսաստանի դեմ տնտեսական ու ֆինանսական պատժամիջոցներին։ Այս մասին հայտարարել է վարչապետ Իրակլի Ղարիբաշվիլին, փոխանցում են վրացական լրատվամիջոցները։ Ավելի վաղ ԱՄՆ-ն, Եվրամիությունը և ՄԵծ Բրիտանիան հայտարարել էին Ռուսաստանի դեմ պատժամիջոցներ սահմանելու մասին: Մեծ Բրիտանիայի վարչապետ Բորիս Ջոնսոնը հայտարարել է «Աէրոֆլոտ» ռուսաստանյան ավիաընկերության և ռուսական բանկերի, այդ թվում՝ ՎՏԲ-ի դեմ պատժամիջոցներ սահմանելու մասին։ Նրա խոսքով՝ ՎՏԲ-ի բոլոր ակտիվները կսառեցվեն։ Ռուսաստանյան առաջատար ավիաընկերության չվերթները դեպի Մեծ Բրիտանիա կարգելվեն։ Լոնդոնը նաև սահմանափակել է Մեծ Բրիտանիայում պահվող ռուսաստանցիների գումարների չափը։ Բացի այդ, կարգելվի բարձր տեխնոլոգիական արտադրանքի արտահանումը Ռուսաստան։ ԱՄՆ նախագահը ևս խոսել է այն պատժամիջոցների մասին, որոնք կսահմանվեն Ռուսաստանի նկատմամբ։ Նրա խոսքով՝ պատժամիջոցները կվերաբերեն Ռուսաստանի սուվերեն պարտքին։ Բայդենը հայտարարել է, որ ԱՄՆ-ն այսօրվանից պատժամիջոցներ է սահմանում ռուսական էլիտայի նկատմամբ։ Պատժամիջոցներ կսահմանվեն նաև ռուսական բանկերի նկատմամբ։ Նա ընդգծել է, որ թույլ չի տա այնպիսի պատժամիջոցներ, որոնք կհանգեցնեն ամերիկյան սպառողների համար բենզինի գների աճին: 2022 թվականի փետրվարի 24-ին Ռուսաստանի նախագահ Վլադիմիր Պուտինը հայտարարեց Դոնբասում հատուկ ռազմական գործողության անցկացման մասին։ Նա հավաստիացրել է, որ Մոսկվայի պլանների մեջ չի մտնում Ուկրաինայի օկուպացիան, միայն նրա ապառազմականացումն ու ապամիջուկայնացումը։ ՊՆ-ն ընդգծել է, որ Ռուսաստանի Զինված ուժերը հրթիռային, ավիացիոն կամ հրետանային հարվածներ չեն հասցնում Ուկրաինական քաղաքներին: Գերճշգրիտ միջոցներով շարքից դուրս են բերվում ռազմական ենթակառուցվածքը, քաղաքացիական բնակչությանը ոչինչ չի սպառնում: